شەفەق نیوز/ وەردەوەردەی ناوەین هندستان و پاکستان وەردەوامە، لە وەختیگ هەردوگلا ئمڕوو چوارشەممە راگەیانن کە لە ئەنجام گورز وەشانن  کوشیان کەفتیە.

وەرپرسیگ هتدستان راگەیان کە لەوەر پەلامار پاکستان وەبان بەش هندستان کشمیر، 7 کەس کوشیانە و 35 کەسیش زەخمدار بوین.

وەرپرسیگ ئەمنی هندستان وت« سێ فڕۆکەی جەنگی هندستان وە هوکاریگ نادیار لە لەبان خاک هیندستان کەفتنەسە خوارەو.

وەرانوەر ئەوە، وەرپرسیگ پاکستانی راگەیان کە پەلامارە مووشەکییەگەی هندستان وەبان مزگەفتی بەهاوالپور بویە مدوو کوشیان ١٣ کەس کە ژن و مناڵیش هاناویان.

هندستان ئمڕوو چوارشەممە پەلامار پاکستان دا و بەشیگ لە کشمیر کە لە ژیر ئیدارەی ئیسلام ئابادە، پاکستانیش بانگەشەی ئەوە کرد کە پڵنج فڕۆکەی جەنگی هندستانی خستیەسە خوارەو، یەیش گەنترین جەنگە ناوەین دوو دوژمنە کویەنەگە لە ماوەی زیاتر لە ٢٠ ساڵ.

هندستان راگەیان کە نۆ شوین "ژیرخانی تیرۆریستی" پاکستانی کردیەسە ئامانج، کە بەشیگیان پەیوەندی وە پەلامار چەکداری وەبان گەشتیارەیل هیندۆس لە مانگ گوزەشتە لە کشمیر هەس، هەناێ ٢٦ کەس کوشت.

سەرچاوەیگ وەرگری هندستان ئەرا ئاژانس ڕۆیتەرز وت: هیزەیل خندستان پەلامار بارەگایل گروپە چەکدارەیل جەیش محمد و لەشکر تەیبە داگە.

وەزارەت وەرگری هندستان لە بەیاننامەیگ راگەیان کە هندستان خوەیگردن فرەیگ لە هەڵوژاردن ئامانجەیل و شیواز جیوەجیکردن نیشانداگە.

پاکستان بڵاو کرد کە مووشەکەیل هندستان سێ شوین گردنە و قسەکەر سەربازی هندستان ئەرا ئاژانس ڕۆیتەرز وت: پەنج فڕۆکەی هندستان خریانەسە خوارەو.

ئەحمەد شەریف چاودری، قسەکەر سەربازی پاکستان وت: "گشت ئی پەلامارەیلە ریکار وەرگری بوین، پاکستان تا ئیسەیش وڵاتیگ وەرپرسیاری بەرزە، وەگەرد ئەوەیش گشت گامیگ خوازیاگ نەیمن ئەرا وەرگریکردن لە کەرامەت و یەکپارچەیی و سەروەری پاکستان".

ئیسلام ئاباد پەلامارەگەی نیودەلهی وە "کردەوەیگ ئاشکرای جەنگ" باس کرد و وت: "ئەنجومەن ئاسایش نەتەوە یەکگرتگەیل ئاگادار کردگە کە ماف خوەیە وەڵام پووڕیاگ لەبان دەستدرویژی هندستان بەێدەو".