شەفەق نیوز - ریاز
هیزەیل هاوپەیمانی پاڵپشتی شەرعیەت لە یەمەن، رووژ یەکشەممە، راگەیان وە پۊچەڵکردنەو و خاپوورکردن پەنج مووشەک جیاجیا کە ناوچەیل پەرتەوازەیگ لە سعودیە کردنەسە ئامانج، لە سەعاتەیل شەوەکی زۊەو.
قسەکەر فەرمی وە ناو هاوپەیمانیەگە، تورکی مالکی، لە بەیاننامەیگ لەڕی پلاتفۆرم "ئێکس"، وت، کە وەرگرییە ئاسمانییەیل دوو مووشەک بالیستی پۊچەڵەو کردنە و ویرانیان کردنە کە گرووپ حوسییەیل وەرەو پایتەخت ریاز وەشاننەسەی.
وەرجە ئەوەیش هاوپەیمانیەگە راگەیانۊد، لە شەوەکی زۊ ئمڕوو، وە پۊچەڵکردنەو و ویرانکردن مووشەکیگ بالیستی کە گرووپەگە وەرەو ناوچەی خوەرهەڵات تەقانۊدی، لە وەختیگ دەسەڵاتەیل سعودی خەوەردان وە لاچگن رخەگە دۊای وەکارخستن زەنگ هوشداری وەرجەوەخت لە ریاز و ناوچەی نەجران.
تا ئیسە هیچ بەیاننامەیگ لە گرووپ حوسییەیل دەرنەچگە کە وەرپرسایەتی تەقانن ئەو مووشەکەیلە وەرەو سعودیە بگرێدە مل، هەڕچەن جیوەجیکردن شەش پرۆسە وە وەکارهاوردن مووشەکەیل بالیستی و باڵدار و فڕۆکەیل بیفڕۆکەوان راگەیان، کە وت شوینەیل سعودی کردنەسە ئامانج، کە دامەزراوەیل نەفتی و شوینەیل سەربازی لە ناویانە.
ناوچەی خوەرهەڵات کەفێدە بەش خوەرهەڵات لە شانشینەگە لەبان کەنار کەنداو، و شمارەیگ لە شار و پارێزگایەیل لەخوەی گرێد، کە دەمام و ئەحسا و جوبەیل و قەتیف و حەفەر باتن لە ناویانە.
لە چوارچیوەیگ پەیوەندیدار، پلاتفۆرمەیل هەواڵی زانیارییەیلیگ لەباوەت وسانن جۊلەی کەشتیوانی ئاسمانی لەڕی فڕۆکەخانەی مەلیک فەهد ناودەوڵەتی لە دەمام ئاڵوگۆڕ کردن، وەپشتبەسین وە زانیارییەیل ماڵپەڕ "فلایت رادار" کە پسپۆڕە لە وەدۊاچگن جۊلەی فڕۆکەوانی، وەبی دڵنیابۊنیگ فەرمی لەی باوەتە.