شەفەق نیوز - وەدۊاچگن

قسەکەروەناو فەرمی وەناو هێزەیل هاوپەیمان عەرەبی وە سەرکردایەتی سعودیە ئەرا پاڵپشتیکردن شەرعییەت لە یەمەن، تورکی ئەلمالکی، رووژ شەممە، خەوەر دا لە نواگیریکردن و ویرانکردن فڕۆکەیگ بیفڕۆکەوان "دژمنکارانە" لە ناوچەی ریاز.

 ئیە لە دۊای ئەوە تیەێد کە مالکی، دۊکە جمعە، راگەیانۊد لە نواگیریکردن و ویرانکردن فڕۆکەیگ بیفڕۆکەوان کە وەرەو هەمان ناوچە کل کریاۊد، بيجگە لە وەخوارخستن مووشەکیگ بالیستی کە گرووپ حووسییەیل وەرەو ناوچەی باشوور لە شانشینەگە کل کردۊن.

 لە وەختیگ گوزەشتە لە ئمڕوو، وەرگری شارستانی سعودی زەنگیگ هوشداری دا ئەرا ئاگادارکردن لە رخبارییگ مومکین لە خەمیس موشەیت و ناوچەی جازان، وەرجە ئەوەگ دۊاتر خەوەر بەێد لە نەمەنن مەترسییەگە لە هەر دوو ناوچەگە.

 پەلامارەیل بەزینەر سنوورەیل لە ناوەین هاوپەیمانییەگە کە سعودیە سەرکردایەتیی کەێد، و پاڵپشتی حکومەت یەمەنی دانیپیانریاگ ناودەوڵەتی کەێد، و لە ناوەین گرووپ حووسی کە کۆنترۆڵ پایتەخت سەنعا کەێد، فرەترەو بۊن.

 ناوچەی خوەرهەڵات، کە نۊنەرایەتی هێز ئابووری ئەرا سعودیە کەێد، کەفتە وەر پەلامارەیل فرەیگ لەلایەن حووسییەیلەو لە ماوەی هەفتەیل کەم گوزەشتە.

ناوچەگە فرەی یەدەگەیل شانشینەگە لە نەفت و گاز لەخوەی گرێد، و هەمیش بارەگای سەرەکی کۆمپانیای ئارامکۆی سعودی ئەرا نەفت لەناویە، کە زیانەیل گەورەیگ وەپی رەسی لە پەلاماریگ کە لە وەختیگ گوزەشتە لە مانگ ئۆکتۆبەر/ تشرین یەکەم روی دا.