شەفەق نیوز/ هەوریگ ژەهراوی کلۆر بویە مدوو ئەوە کە 160 هەزار کەس لە ماڵەیلیان لە ناوچەیگ نزیک لە بەرشەلۆنەی ئیسپانیا گیر بان، دویای ئەوەگ هەورەگە لە ئەنجام ئاگر لە ئەماریگ پیشەسازی بەرزەو بوی.

وەگورەی ئامارەیل وەڕێوەبەرایەتی ئاگرکوشانن ناوچەگە، ئاگرەگە ئمڕوو شەممە، لە ناوچەی کەنار دەریای ڤیلانۆڤا ئی لا گێلترو لە باشوور بەرشەلۆنە، لەناو ئەماریگ هیز گرد کە کەرەستەی پاکەوکردن مەلەوانگە لەناوی بویە.

وەرگری شارستانی لە سۆشیال میدیا راگەیان: "ئەگەر لە ناوچەی زیانلیکەفتگ (ئاگرەگە) بوێ لە ماڵ و شوین خوەد بمین".

دەسەڵاتدارەیل ئامووژگاری دانیشتگەیل کردنە دەر و پەنجەرە لەو ناوچەیلە بوەسن کە داخداری لەبانیان هەس، کە وە درویژایی کەناراوەیل لە ڤیلانۆڤا ئی لا گێلتروەوە تا ئاوای کالافێل لە نزیک تاراگۆنا رەسیە.

دویای ئەوە، دەسەڵاتدارەیل ئیسپانیا دویای رەدبوین رخداریەگە هوشدارییەگە هەڵگردن.

تا ئیسە هویچ زیانیگ گیانی نەویە، وەگورەی وەڕێوەبەرایەتی ئاگرکوشانن، کە دیاری کرد کە شمارەی فرەیگ لە یەکەیلی ئەرا کۆنترۆڵکردن ئاگرەگە جیگیرکردگە و چەودیاریکردن تەکان گاز دەرەنجامی کەێد ئەرا ئاڵشتکاری لە ئاست ژەهراویبوین.

دەسەڵاتدارەیل ریوبان و وێستگەیل قەتار ناوچەگە وسانن و ریگری لە نزیکەوبوین مەردم ناوچەگە کردن.

خۆرخی ڤینالێس ئالۆنسۆ، خاوەن ئەماروگە لە چەوپیکەفتنیگ ڕادیۆیی وت: "دەگمەنە کلۆر ئاگر بگرێد، بەڵام ئەگەر ئاگر بگرێد، کپەوکردنی فرە سەختە"، مەزەنە کرد کە ئاگرەگە  لە پاترییگ لیتیۆمەو بویە.

لەلای خەوەییش، خوان لویس ڕویز لۆپێز، سەرۆک شارەوانی ڤیلانۆڤا ئەرا تەلەفزیۆن دەوڵەتی ئیسپانیای وت: دەسەڵاتدارەیل مەزەنە کەن "هەورە ژەهراوییەگە دەسوە چویچیان بکەێد" وەگەرد کپەوکردن ئاگرەگە.