شەفەق نیوز- وەدۊاکەفتن

هەردوگ کلكریای ئەمریکی جارید کۆشنەر و ستیڤ ویتکۆف، ئمڕوو شەممە رەسینە مۆسکۆ، وەپای راگەیاننیگ رووسی.

سەرۆک ئەمریکی دۆناڵد ترەمپ دۊکە جمعە راگەیاند، کە هەردوگ کلكریای جارید کۆشنەر و ستیڤ ویتکۆف کل کەێدە مۆسکۆ و کیێڤ و پێشنیاریگیان ئەرا کووتاییهاوردن وە جەنگ کە چوار ساڵە لە ئۆکرانیا وەردەوامە.

ترەمپ وت "ستیڤ ویتکۆف و جارید کۆشنەرم کل کرد، ئەوان دوو دانوسەنکار وەتوانان، کار رەنگینیگ کردنە، و کلیان کردیمن تا بۊنیمن ئایا تۊەنیەێد بڕەسیمنە رێککەفتنیگ، شایەت دەرفەتیگ خاس بوود ئەرا وەدیهاوردنی".

هەمیش وت "ئەوان پێشنیاریگ وەپیانە ئەرا کووتاییهاوردن وە جەنگەگە".

سەرۆک ئەمریکی خوەی دویر خست لە ئاشکراکردن ئەوەگ ئایا پلانەگە دەسوەردان ئۆکرانیا لە زەوییەیل لەخوەی گرێد مە باسی کردۊد، باوجی وت "ئیمە نووڕینیگ ئەرا ئاشتی دیریمن".

ئی گامە نووترین تەقەلای واشنتۆن دۊنێد ئەرا شکانن سڕبۊن دیپلۆماسی لە تونترین کێشە کە ئەوروپا لە وەخت جەنگ جەهانی دویەمەو وەخوەی دیە، کە وەگەرد جەنگ رووسی و ئۆکرانی لە ساڵ 2022 دەس وەپی کرد.

ماڵپەڕ "ئەکسیۆس" ئەمریکی خەوەردا کە هەردوگ کلكریایەگە رووژ شەممە چەویان کەفێدە سەرۆک رووسی ڤلادیمێر پوتین لە مۆسکۆ، دۊاتر رووژ یەکشەممە سەرۆک ڤۆلۆدیمێر زێلینسکی لە کیێڤ دوینن، و کرملین خوەی لە لێدوان دویر گرد.

تەقەلا دیپلۆماسییەیل کە ویلایەتە یەکگرتگەیل سەرکردایەتیی کەێد ئەرا دانان سنووریگ ئەرا جەنگ رووسی و ئۆکرانی لە مانگەیل دۊایی وەربەس کەفتە وەریا، وەگەرد ئاڵشتبۊن فتراق واشنتۆن وەرەو جەنگ وەگەرد ئیران، تا جەنگ رووسیا و ئۆکرانیا بوودە خەراوترین کێشە کە ئەوروپا لە وەخت جەنگ جەهانی دویەمەو وەخوەی دیە، کە بۊە مدوو کوشیان هەزاران مەدەنی و سەدان هەزار سەرباز.

ئی سەردانە یەکەم سەردان بوود ئەرا برادەر ترەمپ، پیاو کار ویتکۆف، و  کۆشنەر زاوای ئەرا کیێڤیگ کە جەنگ دڕیەسەی، لە وەخت گلەوخواردن ترەمپ ئەرا کۆشک چەرمگ لە ساڵ گوزەشتە وە پەیماندان وە چارەسەرکردن کێشەگە.

ویتکۆف و کۆشنەر، کە بەشداری لە دانوسەنینەیل وەسانن تەقەکردن لە غەزە و ئیران کردن، چەن جارەیگ چگنە مۆسکۆ لە تەقەلا دیپلۆماسییەیل وەرین.