شەفەق نیوز- وەدویاچگن

سێ کەس گیان لەدەسدان، لە وەختیگ هیمان 36 کەس ترەک بێسەروشوینن، لە ئەنجام ئاگریگ کە لە کارخانەیگ نانەواخانە و شیرینی لە خوەرئاوای جاکارتای پایتەخت ئەندەنوسیا هیزگرد، وەپای وەرپرسیگ لە ئاژانس گەردین و قورتارکردن ناوخوەیی.

وەرپرسەگە، ریزکی دویانتۆ وت، ئاگرەگە، دۊیەکە شەممە، لە کارخانەی "ڤۆنۆسا ئاگۆنگ مۆلیا" لە ناوچەی سیرانگ هیزگرد، وە دویری نزیکەی 50 کیلۆمەتر لە پایتەختەو، و هەمیش بویە مدوو زەخمداربوین چوار کەس کە ئەرا خەسەخانە و بنکەیگ تەندروستی نزیک کلکریان ئەرا وەرگردن چارەسەر.

دیمەنە تەلەفزیۆنییەیل کە لە شەو توومار کریانە بەشەیلیگ لە کارخانەگە نیشان دان، کە تایبەتە وە دروسکردن شیرینی و بەرهەمە شەکرییەیل، کە ئاگر لەلی هیزگردیە، لە وەختیگ بەشەیلیگ لە قەواسەگەی وە مدوو ئاگرەگە ڕمیان.

دویانتۆ دووپات کرد، لە وەردەوامی ئاگرەگە لە بەشەیلیگ کارخانەگە تا یەکشەممە، کە ئەوەیش ئۆپراسیۆنەیل گەردین وە شوین بێسەروشوینەیل سەختر کەێد، و ئاشکرا کرد، تیمەیل قورتارکردن وەردەوامن لە تەقەلایەیل ئەرا دیاریکردن شوین قوربانییەیل.

وتیش "گشت ئەندامەیل تیم گەردین و قورتارکردن هاوبەش ئەوپەڕی تەقەلای خوەیان دەن ئەرا دیاریکردن شوین قوربانییەیل، وەگەرد پیشکەشکردن فریاکەفتن سەرەتایی ئەرا سەلامەتی کەسەیل لە گۆرەپانەگە".