شەفەق نیوز/ هەڵپووقیان گڕکانیگ لە خوەرهوڵات ئیندۆنیسیا زیڕە خشتە ناو مەردمەگە، و بویە هوکار کوشیان 10 لەلای ، و خوەڵەکوو و پەراشەی ئاگر وەرەو ئاوایەیل وەشان، وەقسەی وەرپرسەیل، ئمڕوو دووشەممە، وەگەرد بەرزکردن پلەی ئامادەباشی ئەرا بەرزترین ئاست.

گڕکان کویەی لیوتوبی لاکی - لاکی تەقیەو، کە گڕکانیگ دووانەکیە، بەرزییەگەی رەسێدە 1703 مەتر لەبان دوورموب فلۆریس، وەرجە نیمەی شەو، کە دەسەڵاتدارەیل ناچار کرد چەن ئاواییگ چووڵ بکەن.

مەردمەگە باس کردن کە هەناێ ئەو سانەیل گڕدارە لە دەم گڕکانەگە وەرەو ماڵەیلیان هاتن، چوین زیڕە کەفتە ناویان.

یەکیگ لە خەڵک ئاوایەیل وت: زوان ئاگر بەرزەو بوی، و خوەڵەکوو و سان پڕ ئەو ناوە بوی، و ئاگر لە دوکانەگەم هیز گرد.

قسەکەر ئاژانس سووکەوکردن تیژی رویداوەیل ئیندۆنیسی لە کۆنگرەیگ رووژنامەوانی وت: 10 کەس کوشیانە و 10295 زەرەدمەن بوینە باس گڕکانە.

رووژنامەوانی لە فرانس پرێس لە ناوچەیگ نزیک گڕکانەگە وت: پەنج ئاوای چووڵ کریا، کە هەزاران کەس مینەی شوین کەن.

پارچەی کوڵفتیگ لە خوەڵەکوو بینایل نزیک گڕکانەگە پووشی، و لەماڵەیل چووین ئاگر هیز گرد، و سانە گڕدارەیل ئەو ناوە چاڵچاڵەو کردن.

گڕکانەگە وەرجە نیمەی شەو تەقیەو، ئیجا جاریگ ترەک لە ساعەت 1,27 (17,27 وەخت گرینتش یەکشەممە) تەقیەو، و دووارە لە ساعەت 2,48، وەگورەی ئاژانس زانست گڕکان لە وڵاتەگە.

ئاژانسەگە پلەی ئامادەباشی بەرزەو کرد، و ئاگادار خەڵکەگە و گەشتیارەیل کرد وە هەفت کیلۆمەتر لە دەم گڕکانەگە دویرەو بکەفن.

لە بەیاننامەیگ ئمڕوو دووشەممە وت: گڕوگورجی گەورەیگ لە گڕکانەگە لەبان کویەی لیوتوبی لاکی - لاکی توومار کریاس.

خەڵکەگە وتن: بەدترین کەشوهەوا وەگەرد یەکەمین هەڵپووقیان گڕکانەگە بوی.

کویخای ئاواییگ لەناو ئەو دوورگەی کە فرەی خەڵکی کاسۆلیکیین، وت: هویچ نشانەیلیگ ئاگاداری وەپیمان نەڕەسی جویر بەڵاچە و گرمەهڕ.

وتیش: دویای نیمەی شەو، زیڕە کەفتە ناو مەردم و دەسکردنە چووڵکردن شوینەگە، هەناێ دەو کردیمن، نەزانستیمن پایەسە چە وەرد خوەمان بویمن، ئەرا وە وەبی هاوردن چشتیگ وایمن.