شەفەق نيوز– تەهران

کۆمپانیای ئاو و ئاوەڕۆی لە پارێزگای تەهران، ئمڕوو یەکشەممە، راگەیان کە پایتەخت ئیران کەفتیەسە گەنترین رەوش ئاوی لە سەد ساڵەو تا ئیسە، لە ئەنجام هشکەساڵی وەردەوام لە ماوەی پەنج ساڵ دویایین، و داوەزیان بڕەیل واران لەی ساڵە، کە وە سەختی کاریگەری لەبان سەرچەوەیل ئاو داشت.

   کۆمپانیاگە وتیش: ئەو بەنداوەیلە کە ئاو دەنە تەهران رەسینەسە خوارترین ئاستیان لە سەدیگەو تا ئیسە، و هوشداری لە بەرزەوبوین قەیرانەگە لە ماوەی وەرز تاوسان دا.

 حوسام خسرەویان وەڕیەوبەر جیوەجیکار کۆمپانیای ئاو تەهران وت: پایتەختەگە چوودە ناو پەنجەم ساڵی لە هشکەساڵی، دووپاتیش کرد دابینکردن ئاو، وەتایبەت ئەرا کەرت پیشەسازی سەختیەیل گەورەیگ دوینێد.

 داوا لە هاوڵاتیەیل کرد وەکارهاوردن ئاو کەمەو بکەن، دووپاتیش کرد کە پرۆژەیل کلکردن ئاو تەنیا چارەسەری وەختانەس.

لەلای خوەییش، محمد سادق موعتمدیان پارێزگار تەهران ئەرا ئاژانس "ئیلنا" وت: بڕ وارانەیل ئەمساڵ وە رێژەی 35% وەگورەی ریژەی ماوەی درویژ داوەزیا،و14% وەگورەی پارەکە داوەزیاس.

وتیش: فرەی سەرچەوەیل ئاو لە پارێزگاگە پشت وە ئاو ژیرزەوی بەسن، وەگەرد بڕ کەمیگ لە پەنج بەنداوەگە، و وەگەرد ئەو داوەزیان تیژە لە ئاو بەنداوەیل، دەسەڵاتەیل ناچار بوین پرۆژەی هاوردن ئاو لە دەیشت پارێزگاگە جیوەجی بکەن.

   بەشیگ لە ناوچەیل ئیران، وەتایبەت تەهران پایتەخت، بڕیان فراوانیگ لە ئاو و بەشەوکردنی وەخوەیان دوینن.

لە رووژ سێشەممە 15 يوليو/ تمووزەو، راپۆرتەیل باس بڕیان ئاو کەن، وەتایبەت لە تەهران، یەیش تا چوارشەممە و پەنجشەممەی گوزەشتە وەردەوام بوی.