شەفەق نیوز/ سارە نتنیاهو ژن سەرۆک وەزیرەیل ئیسرائیل، ئمڕوو دووشەممە، وت: ئەو پەلامارە وە فڕۆکەی بێفڕۆکەوان کە وەرجەیە ماڵیان کردە ئامانج، تەقەلا بویە ئەرا کوشتنیان.

سارە نتنیاهو لە یەکمین قسەیلی لەبان پەلامار دڕۆنەگە لە قیساریا وت: پەلامارە دڕۆنەگە تەقەلای کوشتن خوەم و شویەگەم بوی، یەیش نەگ تەنیا دەسدرویژیە وەبان ئیمە، بەڵکو وەبان ئیسرائیل و گەل ئیسرائیلیش بویە.

بینایگ لە قیساریا زەرەدەیل سووکیگ وەپی رەسیە وەبی کەفتن زەخمداری، و هیزەیل فرەیگ لە پولیس رەسینە شوین رویداوەگە وەگورەی سایت ئیسرائیلی "والا".

سەرچەوەیلیگ وتن: خەوەر هەس کە فرۆکەیگ بیفرۆکەوان ماڵ بنیامین نتنیاهو سەرۆک وەزیرەیل لە قیساریا کردیەسە ئامانج، کە کەفێدە کناراو دەریای ناوڕاس.

نویسنگەی سەرۆک وەزیرەیل ئیسرائیل لەو وەختە دووپات کرد کە فرۆکەیگ بیفرۆکەوان لە لوبنانەو هاتیە، ماڵ نتنیاهو لە قیساریا کردیەسە ئامانج.

کناڵ 13ی ئیسرائیلی وت: نویسینگەی نتنیاهو دووپات کرد کە فرۆکەیگ بیفرۆکەوان وەرەو ماڵ نتنیاهو وەشیا، وتیش؛ نتنیاهو و خیزاگەی لەماڵ نەوینە.