شەفەق نیوز/ شار لۆس ئەنجلس ئەمریکا، تاوان دڵتەزنیگ وەخوەی دی، هەنای ژنیگ لد تەمەن ٣٨ ساڵی، ٣ لە مناڵەیلی کوشت، لەوەر چشتیگ ئەڵاجەوی. 

رووژنامەی دەیلی میل بەریتانی وت: دویای ئەوە ک کابرایگ پەیوەندی وە دەسەڵاتەیل ئەمنی کرد، تا ئاگاداریان بەکێد ک خانم هاوسای، ئەنگیلا دۆن فلۆریس، ساعەت یەک دویای نیمەشەو هاتیەسە ناو ماڵیان، و کتاویگ ئینجیل وەگەرد موومیگ وەدەسی بویە.  

پۆلیس رەسیە شوینەگە، و فلۆریس رەسانە خەسەخانە، و گومان لە چشتیگ نەکرد.  باوجی لە ساعەت هەشت شەوەکی، ئەفسەر پۆلیس لۆس ئەنجلس خەوەر لە کەسیگ چەکدار وەرگرد ک ها ناو ماڵەگەی فلۆريس،  ک ئەو چەکدارە کوڕ ١٦ ساڵان فلۆریس بوی.     

هەنای پۆلیس رەسیە شوینەگە،  تەرم سێ مناڵ ئەنگیلا دۆن فلۆریس پەیا کرد،  ناتالی ١٢ ساڵان،  کیڤین ١٠ ساڵان، ناسان ٨ ساڵان.    

داڵگەگە، لەوەردەم دادگا ئاشکرا کرد ک خوەی سێ مناڵەگەی کوشتیە، و کوڕ چارەمی دەسمیەتیی داگە، و کوڕەگە ئۊشێد: ئی قسە درووە. 

فلۆریس لە دادگا وتیش: لەلای خوەیەو شەیتان چیەسە پووس سێ مناڵەگەی، ئەراوە کوشتیەسەیان.  

جاکۆپ شوی وەرین فلۆریس، ئەرا رووژنامەی ئەنجەلوس تایمز وت: وەرجە هەفتەیگ فلۆریس تەلەفۆنی کردیە، و باس ئاین ئەرای کردگە، وتیش: چشتەیلیگ باس خودا ئەرام کرد، و نیەزانم کەی وەیجۊرە وەپی هاتگە، ک وەرجەیە هویچ پەیوەندییگ وە ئاین نەیاشتیە.