شەفەق نیوز/ کۆمسیۆن نەتەوە یەکگرتگەیل ئەرا ماف مرۆڤ وت: خیزانەیلیگ ئەفغانی کەفنە وەر نەداری سەخت و وورسگی، و بەشیگیان پەنا وەکارکردن زاڕووەیلەیان بردن، یا وەشۊداین دۊیەت ناخاڵەیان، یا جاروباریش ناچار فرووشتنیان بوون.       

کۆمسیۆنەگە لە بەیاننامەیگ ئمڕوو سێشەممە وت: بزووتنەوەی تاڵیبان و بزووتنه‌وه‌ی دەوڵەت ئیسلامی لە ویلایەت خوراسان،  فرە لە کوڕەیل ناخاڵە خەنە بان خاڵەیل وەشکین،  یا وە جەنگاوەر تووماریان کەن.    

و باس کوشیان زیاتر لە ١٠٠ کەس لە ئەندامەیل ئەمن نیشتمانی ئەفغانی وەرین، لەوەختیگ تاڵیبان دەسی ناسە بان دەسەڵاتەگە.    

کۆمسیۆنەگە دووپات کرد ک ٨ چالاکوان لەلای کەمەو و دوو رووژنامەوانی کوشیانە، و ٥٩ کەس وەبی رۊییگ یاسایی زیندانی کریانە.             

لە مەوقەیگ گوزەشتە دەزگای قەیرانەیل ناودەوڵەتی (ICG) وت: ئەگەر کۆمەڵگای ناودەوڵەتی پاڵپشتیکردن ئابووری ئەرا ئەفغانستان زیایەو نەکەێد، ئەوەسا شمارەی ئەو ئەفغانیەیلەگ لە وورسگی مردن زیاترەو بوود لەواەنگ لە جەنگەیل ٢٠ ساڵ گوزەشتە مردنە.