ئی شمارە دوو ئەوەنوی ئەو شمارەس کە لە نیمەی یەکەم ساڵ ٢٠٢٢ توومار کریایە، وەپەی ئامارەیل سندوق مناڵەیل نەتەوە یەکگرتگەیل (یونیسێف) کە داوای فراوانکردن ری بیوەیی و یاسایی و ئاسانکردن ئەرا زاڕووەیل وەخاتر وەدەسهاوردن مقیەتیکردن لە ئەوروپا کردیە.

ڤێرینا کناوس، وەڕیەوبەر کووچ و ئاوارەیی یونیسێف، مەزەنە کرد کە شمارەی راسی کوشیاگەیل زیاتر بوود، چوینکە فرەیگ لە کەشتیە نوقمبویەیل لە ناو دەریای ناوڕاس رۆگاربویەیل پەیا نیەکەن یا توومار نیەکریەن.

 وتیش؛ "شمارەی ئەو زاڕووەیلە کە مەوقەی تەقەلای رەدبوین لە دەریای ناوڕاس تا بڕەسنە ئەوروپا گیانیان لەدەسدانە لە نیمەی یەکەم ئمساڵ  بەراورد وە هەمان ماوەی ساڵ گوزەشتە دوو ئەوەنە زیای کردیە".

کناوس وتیش: "ئی مردنەیلە وە تەواوی توەنیەێد ریگری لەلیان بکریەێد"، وتیش؛ "لە شەش مانگ یەکەم ئمساڵ، مەزەنە کەیمن کە 11 هەزار و 600 مناڵ رەود بوینە".  لە سێ مانگ یەکەم ساڵ ٢٠٢٣، ٣٣٠٠ زاڕوو بی یاوەر یا جیاوەبوی توومار کریانە، کە رەسێدە ٧١% گشت ئەو مناڵەیلەگ لە ری دەریای ناوڕاسەو رەسینەسە ئەوروپا،  ئی شمارە سێ ئەوەنە زیاترە لە خود ماوەی ساڵ گوزەشتە.

کناوس شەرمەزار بیباکی رواڵەت فرەیگ لە ئەوروپا، لەناویان ئەو کەسەیلە کە خەریکە چنە کەنارەیل دەریای ناوڕاس ئەرا وەسەربردن پشوو هاوین کرد، وەو کارەساتەیلە ک رووژانە  لەی ئاوەیلە روی دەن.

ئەو وەرپرس نەتەوە یەکگرتگەیلە وتیش: ئەوە راسییگە، راسیە شۆککەرەگە، بەڵام لیوا دیارە ئیمە فرە ئاشتەو بویمنە وەگەرد راسی ئەو مناڵەیلە کە رووژ لە دویای رووژ وەسەریان تیەێد، وتیش؛ "ئی مناڵەیلە تەنیا لەوەردەم چەومان نیەمرن، ک دیارە چەویلمان نویقیایە". هەمیش وت: "هەر مناڵیگ کە مردیە، زەردەخەنەیگە ک هەرگیز نیەوڕیەێد، خەویگە قەت نیەتێدە دی".