شەفەق نیوز/ نەتەوە یەکگرتگەیل، ئمڕوو پەنجشەممە، ئاشکرای داوەزین گەورەیگ لە رەوشەیل ژیان لە ئاست جەهان کرد، ئەوەیش لەوەر پەتای کۆڕۆنا و ئاڵشتبوین کەشوهەوا و قەیرانەیل سیاسی، لە وەختیگ پسپۆڕەیلیگ باس رخیان لە وەردەوامی ئەو رەوشە کەن تا بڕەسێدە گەنتر.

نشانەی ئەوزەوڵکردن بەشەری ک لەلایەن بەرنامەی نەتەوە یەکگرتگەیل ئمڕوو دەرچگ، نشان دا ک رەوشەیل ژیان لە ٩٠% لە دەوڵەتەیل جەهان لەماوەی ساڵ ٢٠٢١ بەدترەو بویە.

ئەکیم شتاێنەر وەڕیەوبەر بەرنامەی نەتەوە یەکگرتگەیل وت: لە لویتکەی قەیران داراییش وەرجە ١٠ ساڵ، نشانەگە تەنیا لەناو یەک دەوڵەت لە هەر دە دەوڵەت داوەزیا.

وتیش: هەمیشە توەنیمن رەوشەیلمان جویر ئامار باس بکەیمن، پرسیارەگە ئەوەس ک" ئەڕا جویلە نیەکەیمن؟.

شتاینەر لە دیداریگ وەگەرد ئاژانس فرانس پڕس وت: یە واتە ئیمە وەرجەوەخت مریمن، و ئیمە خوەنەواریمان کەمترە و داهاتمان داوەزێد.

ئی داوزینە نزیکە لەبان گشت جەهان تاریکەو بوود، ک رەسێدە زیاتر لە ٩٠% دەوڵەتەیل، ئەگەر ئەو جیاوازی ئیسەیش لەناو جویراجویر وڵاتەیل زاقە، هیمان سویسرا و ئایسلەندا هانە نوای لیستەگە، و باشوور سوودان و چاد و نەیجەر هانە خواری.

شتاینەر دووپات کرد ک وەرجەیە چینمەسە کارەساتەیلیگ و جەنگیش بویە، باوجی وە کەڵەکەبوین ئەوەگ ئمڕوو کەفێدە وەرمان شکست گەورەیگە.