شەفەق نیوز - پیۆنگیانگ

ئاژانس ناوەندی کۆریا، رووژ یەکشەممە، راگەیان کە کۆریای باکوور مووشەکیگ ناوەندمەودا وەشانیە لە تاقیکردنیگ کە سەرکردە کیم جۆنگ ئۆن سەرپەرشتیی کردگە.

 ئاژانسەگە خەوەر دا کە مووشەکەگە لە خوەرهەڵات کۆریای باکوورەو وەشیاس و ئامانجیگ لەبان دۊری هەزار کیلۆمەتر (621 میل) لە دەریا لە وەرانوەر کەناراو خوەرهەڵات وڵاتەگە کوتاس، و مەشقەگە ئامانجی تاقیکردن و مەشقپیکردن هازەیلیگ بۊە کە سیستەم چەکەیل ستراتیژی کار وەپی کەن کە خێراییەیان لە تونی دەنگ فرەترە، و هەڵسەنگاندن باوەڕپیکریان و لیهاتگی و تۊانای هاز وەرگری جەنگی ئەرا وڵاتەگە لەبان جۊلە.

 ئی وەشاننە، کە نووترینە لە زنجیرەیگ لە تاقیکردنەیل چەکەیل کۆریای باکوور لەی ساڵە، لە وەختیگ تیەێد کە ئاڵووزییەیل لە نیمچەدوورگەی کۆریا بەرزەو بۊنە وە مدوو تەقیان مینیگ زەمینی لە ناوچەی داماڵیاگ لە چەک لە مانگ گوزەشتە کە ئەنجام دا وە زەخمداربۊن سەربازەیل کۆریای باشوور.

 راپۆرت ئاژانسەگە هۊردەکارییەیل لەباوەت وەشاندن مووشەکەگە پیشکەش کرد کە، دۊکە شەممە، کیم یۆ جۆنگ، خوەیشک کیم جۆنگ ئۆن و وەرپرس دیار لە حزب کراکارەیل فەرمانڕەوا ئاشکرای کرد.

 کیم یۆ جۆنگ وت کە کۆریای باشوور و ژاپۆن شکەست هاوردن لە وەدۊاکەفتن رێڕەو چەکەگە، وە زیایکردن ئەوەگ "شیواز رێڕەویگ تایبەت کە چوودە چۊ شەپۆل" کەموکوڵی لە توانایەیلیان لەبان وەدۊاکەفتن ئاشکرا کرد.

 سوپای کۆریای باشوور دۊکە شەممە وت کە چەودیاری وەشاندن مووشەکیگ بالیستی لەلایەن کۆریای باکوورەو کردگە، و مەزەنەیلی رەسینە ئەوەگ مووشەکەگە فرەتر لە 700 کیلۆمەتر بڕیە وەرەو دەریا لە وەرانوەر کەناراو خوەرهەڵاتی.

 ئاژانسەگە لە زوان کیم جۆنگ ئۆن وت کە پیۆنگیانگ بایەسە وەردەوام بوود لە تەقەلایەیلی ئەرا ئەوەگ بیلێد دژمنەیلی بفامن لە "باوەڕپیکریان و کوشندەیی" چەکەیل پەلاماردان ستراتیژییەی، وە دووپاتکردن ئەوەگ وەرەونوابردن هاز وەرگری ناوەکی جویر هەوەجەیگ ئەرا ئاسایش نەتەوەیی مینێد.

 تاقیکردنەگە لە ناوڕاس ئاڵووزییگ بەرزەوبۊ هات دۊای ئەوەگ کیم یۆ جۆنگ لە رووژ جمعە بەیاننامەیگ تون دەرکرد کە لەناوی داواکاری سئۆل رەت کرد ئەرا داوای وەخشین لەبان تەقیان مینە زەمینییەگە لە ناوچەی داماڵیاگ لە چەک کە تۊش زەخمدارییگ سەخت وە سەربازەیل کۆریای باشوور کرد.

 کۆریای باشوور وەرپرسیاریەتی چنین مینەیل خستە بان کۆریای باکوور و داوا لەلی کرد وەخشین لەلی بخوازێد، و کیم یۆ جۆنگ وەسف تومەت سئۆل کرد وە ئەوەگ "هیچ بنەمایگ نەیرێد"، و وت کە کۆریای باکوور وە ئەنقەس مین نەچانیە ئەرا ئامانجگردن هازەیل کۆریای باشوور.

 کۆریای باکوور فرەتر لە دە تاقیکردن مووشەکی لەی ساڵە ئەنجام دایە.