شەفەق نیوز- ئۆسلۆ

کۆشک پاشایەتی نەرویج، ئمڕوو جمعە، خەوەردا لە مردن پاشا هارالد پەنجەم لە تەمەن 89 ساڵی، دۊای شیویان رەوش تەندروسیی.

 کۆشک پاشایەتی لە بەیاننامەیگ وت: "وە پەژارەیگ فرەو، خەوەر مردن خاوەنشکۆ پاشا هارالد ئمڕوو راگەیەنمین، پاشا هارالد وە ئارامی لە خەسەخانەی زانکۆی ئۆسلۆ ئمڕوو جمعە 28 ئاب/ ئۆگۆست سەعات 6:35 شەوەکی (وە وەخت نەرویج) گیان لەدەس دا".

 پاشا هارالد، لە 17ی ئاب/ ئۆگۆست ئیسە بریاس ئەرا خەسەخانە، وەرجە ئەوەگ دۊاتر کۆشک پاشایەتی خەوەر بیەێد کە چارەسەری لە پەتایگ بەکتریایی لەناو خۊن وەرگرێد.

 لە 23ی ئاب/ ئۆگۆست، کۆشکەگە خەوەردا، کە رەوش تەندروسیی مەوقەی پشوو کووتایی هەفتە گەنەو بۊە، و دژە زیندەییەیل وەرگردگە، وەرجە ئەوەگ پەنجشەممە خەوەر بیەێد کە رەوشی بۊەسە "فرە رخدار".

مردن هارالد پەنجەم دۊای زیاتر لە 35 ساڵ تیەێد کە لەبان تەخت نەرویج وەسەر برد، کە لە 17ی کانوون دۊیەم/ یەنایەر 1991 دەسەڵات گردە دەس، لەشوين باوگی پاشا ئۆلاڤ پەنجەم، و دەسەڵاتە دەستوورییەیل پاشا شمارەیگ لە ئەرکە فەرمییەیل لەخوەی گرێد، لەناویانیش سەرۆکایەتیکردن گردەوبوین ئەنجومەن دەوڵەت و سەرپەرشتیکردن وازکردن فەرمی ئەرا پەرلەمان نەرویجی.

 هارالد، کە لە 21 شوبات/ فێبرایەر 1937 لەداڵگبۊە، وەتەمەنترین پاشایەیل ئەوروپا بۊ لە ساڵەیل دۊایی، هەمیش مەنە یەکیگ لە دیارترین کەسایەتییەیل جەماوەری لە نەرویج، وە لوبنان کەمەوبۊن توانای ئەرا جیوەجیکردن بڕیگ لە ئەرکە فەرمییەیلی وەگەرد چگنی وەناو تەمەن.

جی باسە کە پاشا لە ساڵ 2024 راگەیانۊد، کە لەو چالاکییە فەرمییەیلە کەمەو کەێد کە بەشداری لەناویان کەێد وە مدوو چگنی وەناو تەمەنەو، وەلی وە شیوەیگ بڕیاگ دەسکیشانی لە تەختەگە دویرەو خستۊد.

 وە مردن هارالد پەنجەم، ویلایەت تەخت نەرویجی چوود ئەرا گەورەترین کوڕی، شازادەی جێنشین هاکۆن، کە وەرجە یە ئەرکەیل سەرپەرشتی لەبان تەختەگە لە ماوەیل بیماری باوگی و نەتۊنستنی لە جیوەجیکردن وەرپرسایەتییە فەرمییەیلی گردۊدە دەس.