شەفەق نیوز/ گۆڤار نیوزویک ئەمریکی ئاشکرا کرد کە کەشتی فڕۆکە هەڵگر ئەمریکی یو ئێس ئێس کارل ڤینسۆن لە ریە وەرەو خوەرهەڵات ناوڕاس، و لە نزیک ئیران جیگیر بوود.

گۆڤارەگە ئاشکرا کرد کە کەشتیی فڕۆکە هەڵگر USS Carl Vinson لە  زەریای هێمن جیگیر بوی، ئیجا وەرەو خوەرهەڵات ناوڕاس چگە تا پەیوەندی وەرد کەشتی فڕۆکەهەڵگر USS Harry S. Truman بکەێد.

کەشتییە فڕۆکەهەڵگرەگە وەرد هیز ئەرک خوەی کە لە کەشتی ویرانکەر USS Princeton و USS Strat هاناویا، چگە ناو زەریای هیندستانی.

نیوزویک لە ڕاپۆرتیگ وت: ئی گامە لە وەختیگ تیەێد کە ململانێ وەرد ئیران و حووسیەیل لە یەمەن بەرزەو بویە، و هاتێ نیشانەی ئەگەر کاریگ جەنگی ئەمریکا بوود لە رووژ و هەفتەیل بانان.

وەگورەی ئی ڕاپۆرته ، وە رەسین دوو فڕۆکەهڵگر وەیەکەو، ئەمریکا ئیرنگە هیزیگ جەنگکەر هازداریگ لە ناوچەگە دیرێد.

گۆڤارەگە دووپاتیش کرد کە بویین هاوبەشی فڕۆکەهەڵگرەیل کارل ڤینسۆن و هاری ئێس ترومان و فڕۆکە بۆمب هاوێژەیل بی ٢ کە لە دوورگەی دیێگۆ گارسیا جیگیر کریانە، توانای ئەمریکا ئەرا پەلامار ئاسمانی و مووشەکی فرە زیای کەێد و ئەگەر فراوانکردن ئۆپەراسیۆنە سەربازییەیل زیاترەو کەێد.

کەشتیی کارل ڤینسۆن یەکیگە لە دیارترین کەشتییە فڕۆکەهەڵگرەیل ئەمریکا لە جویر نیمیتز، درویژییەگەی زیاتر لە هەزار پاس و نزیکەی ٩٠ فڕۆکە گرێد، لەوانە فڕۆکەی جەنگی دزێو F-35C، فڕۆکەی F/A-18 Super Hornet فرە ئەرک، بیجگە لە فڕۆکەی جەنگی ئەلیکترۆنی EA-18G و فڕۆکەی ئاگادارکردن وەرجەوەختە E-2D.

ئی کەشتییە بڕیگ کەشتی جەنگی وەگەردی هەن کە لە کەشتیی کروزەر مووشەکی "Princeton" و کەشتی ویرانکەر "Strett" کە وە سیستەم بەرگر "Aegis" و مووشەک نواگیریکردن SM-6 کار کەن، یەیش توانای بەرزەو کەێد لە نواگیریکردن فڕۆکە و مووشەک و تەنانەت هەڕەشە بالیستیکییەیل.