شەفەق نیوز/ جۆ بایدن، سەرۆک ئەمریکا رایگەیان: وڵاتەگەی وە بەهای 800 ملیۆن دۆلار چەک و خوازین سەربازی ئەرا ئۆکراینا وەخاتر وەکارهاوردن لە جەنگ دژ رووسیا کل کەێد. 

بەشیگ لەو هاوکارییە سەربازیەیلەی ئەمریکا، 100 سیستەم پەلامار ئاسمانییە ک تووڕ هەواڵی (ABCnews) ئاشکرا کردگە ئەو سیستەمە فڕۆکەی بێفڕۆکەوان خوەیکوشە لە جۊر (Switchblade). 

ئەو جۊرە فڕۆکە بێفڕۆکەوانە چەنە جانتایەگ پشت بۊچگە (لە 60 سانتیمەتر بۊچگترە و کیشەگەی دوو کێلو و 400 گرامە) و لە مەوقەی رەسین وە ئامانج تەقێدەو، ئەراوە وەپیان ئۊشن فڕۆکەی بێفڕۆکەوان خوەیکوش. 

ئەو فڕۆکە بێفڕۆکەوانە، لەبان سەکویگ تایبەت جۊر هاوەن ئەرا ئامانج دوژمن کل کریەێد و تۊنێد تا ماوەی 15 خولەک وەئاسمان بفڕێد.