شەفەق نیوز/ نۆێنەر میدیایل راگەیانن وت: حکومەت ئەمریکا شەوەکی ئمڕوو چوارشەممە، لیزا مونتگومری ک وە کوشتن توومەتبارە، وەسێدارە دا، ک خوەی تەنیا ژنیگە چەوەڕی جیوەجیکردن فەرمان وەسێدارەدان لەلایەن دادگای فیدڕاڵی کرد، دویای ئەوە ک دادگای باڵا دویاترین ریگری لەنوای جیوەجیکردنەگە لاورد.

وەسێدارەدان مونتگومری خوەی یەکەم جارە ک حکومەت ئەمریکی فەرمانیگ وەسێدارەدان دژوە ژنیگ لە ساڵ ١٩٥٣ وە بکەێد، وەگورەی رۆیتەرز.

کیلی هینڕی پارێزەر مونتگومری لە وتارەیل تیژیگ وت: کردەوەیگ بەربەری و نا یاسایی ونا گرنگیگە لەلایەن دەسەڵات ستەمداریگ.

لە بەیاننامەیگ وتیش: وەڕاسیەو کەس  گومان لە خراوبوین سەخت لە مەغز مونتگومری خان نێکەێد، ک بیماریەگەی ئاشکرا کریا و یەکەم جار چارەسەری وەدەس پزشکەیل نووسینگەی زیندانەگان وەرگرد.

تەنیا ژنەگە ک فەرمان وەسێدارەدان فیدڕاڵی لەبانی دریاگە، رووژ سێشەممە، وسانن لە جیوەجیکردن وەسێدارەدانەگەی ئەرا ماوەی ٢٤ ساعەت وەخشیاگە پی، تا دووپات بکریەێد ئەگەر وەگورەی تەندروسی مەغزی شایستەی وەسێدارەدانە یا نە.

مونتگومری داڵگ دووگیانیبگ خنکان، وەرجەیە مناڵەگەی لە زگی درارێد، ئەوەیش دویای ئەوە ک ماشینەگەی تا ١٧٠ میل لە ماڵەگەی خوەی لە کانساس تا ماڵ بوبی جو ستینین ٢٣ ساڵان لە سکیدمور لە وەلایەت میسوری رانست، وەدەسپیچگ سەنین توێتگیگ لەلی، لە دیسەمبەر ٢٠٠٤.

وەلی لەجیای ئەوە، وەپەتیگ خنکانەی، و وەچەقوییگ نەشتەرگەری قەیسەری ئەرای کردگە، ئیجا وایە.

مینەکردنەیل ناو کۆمپیوتەرەگەی مونتگومری دەرخستن ک خوەی مینەی چوونیەتی نەشتەرگەری قەیسەری کردگە، هەمیش داوای بڕیگ لە چشتەیل مناڵ زایین کردگە.

پارێزەرەیل مونتگومری باس کردن ک خوەی لە یانزە ساڵان تەمەنی کەفتگەسە وەر پەلامار سێکسی، و لەوەخت جیوەجیکردن تاوانەگەی بیماری مەغزی داشتگە.