شەفق نيوز- تەهران

کازم سەدیقی ئاخون ناودیار ئیرانی، ئمڕوو یەکشەممە، وازهاوردنی لە سەرنمازخوەنین جمعە لە تەهران راگەیان، دویای ئەوە کە 17 ساڵە لەی پۆستە ئیمام بویە.

 عەلی خامەنەئی ریبەر باڵای ئیران لە بەیاننامەیگ لەبان سایتەگەی وت: سەدیقی پەیامیگ ئەرا خامەنەئی کلکردیە لەناوی داوا کردیە لە ئەرکەیلی جویر ئیمام جمعەی وەختانەی تەهران بوەخشێدەی، وە دەسپیچگ ئارەزووداشتنی ئەرا ئەوە کە وەختی ئەرا کارەیل زانستی و خوەنەواری و بانگەشەکاری وازەو بوود.

خامەنەئی رەزامەنی لەو داواکاریە دا، و ئافەرین لەو خوتبەیل سوودمەن و کاریگەرە کرد کە سەدیقی لە ساڵەیل گوزەشتە پیشکەشیان کرد، لە وەرگریکردن لە رژیم ئیسلامی و تەمەیل رەوشتی و مۆڕاڵی.

   وەلێ بڕیار سەدیقی لە سای توومەتەیلی وە گەندەڵی وە خیزانەگەی هات، دویای ئەوە کە لێکۆڵینەوەی راگەیانن ئاشکرا کرد کە هاتێ سەدیقی دەسیگ لەناو پرس دیاریکردن زەویەیلیگ لە ناوچەی ئەزغەل لە باکوور تەهران داشتگە، کە ئەو باوەتە مشتومڕ فراوانیگ لەناو ئیران دروس کرد.

   دویای ئەوە، قسەکەر دەسەڵات دادوەری راگەیان کە سەدیقی توومەتبار فەرمی نییە لەو باوەتە، وەلێ کوڕەی و وەیوەگەی لەبان ئەو باوەتە دەسگیر کریانە، کە مەزەنەیل زیایەو کرد لەبان زوورەیلیگ لەبان ئەو ئاخونە تا خوەی لە سیمای ئاینی فەرمی بکیشێدەو.

  سەدیقی یەکیگ لە دەمچەوە ناسیاگەیلە لەناو رەوت پارێزدار ئیرانی، و لە ساڵ جویر پیشکەشکار خوتبەی جمعە لە تەهران لە ساڵ 2007 دانریا، لە وەختیگ ناسک کە کیشانن سیاسی لە وڵاتەگە زیایەو بوی.