شەفەق نیوز- یەمەن

قسەکەر وەناو هاوپەیمانی، لیوا روکن تورکی مالیکی، شەفەق شەممە، راگەیان لە ویرانکردن 136 ئامانج سەربازی لە ناوچەیل دەسەڵات گرووپ حووسی.

مالیکی لەڕی هەژمار خوەی لەبان سەکوو "ئێکس" پارچە ڤیدیۆیگ بڵاو کرد کە ویرانکردن ئەممارەیل مووشەک بالیستی لەناو تونێلە کۊیەیل لە سەنعاء بەڵگەدار کەێد.

وتیش کە هاوپەیمانی ئۆپراسیۆنیگ فراوان جیوەجی کەێد کە ئەندامەیل و توانای میلیشیای تیرۆریستی حووسی کەێدە ئامانج، و کار کریەد لەبان هەڵوەشانن و لەناوبردن تووڕ مووشەکە بالیستییەیل میلیشیاگە.

قسەکەرەگە دووپات کرد کە هاوپەیمانی پاڵپشتی ئاسمانی ئەرا یەکەیل هازە چەکدارەیل یەمەنی لە ماوەی 24 سەعات پێشکەش کەێد.

قسەکەر هاوپەیمانی لە وەختیگ گوزەشتە راگەیانۊ لە ویرانکردن 3 سەکوو وەشانن مووشەک کە میلیشیای حووسی وەکاریا تیەرێد ئەرا هەڕەشەکردن لە ئاسایش هەرێمایەتی.

لەلای خوەیەو، میدیای سەر وە حووسییەیل خەوەر دا کە "تووپوارانیگ مووشەکی شار سەعدە و تووڕ پەیوەندییەیل لە ناوچەی سەفڕا کردەسە ئامانج".

وتیش کە "پەلاماریگ وە دوو گورز ئاسمانی هاوپەیمانی، کۆمەڵگای حکومی لە ناوچەی سامع لە باشوور تەعز کردەسە ئامانج، بیجگە لە پەلاماریگ ترەک کە وێستگەی کۆمپانیای نەفت لە ناوچەی باجل لە حودەیدە کردەسە ئامانج".

لە وەرانوەر یە، حکومەت یەمەنی داوا لە ئەنجومەن ئاسایش ناودەوڵەتی کرد ئەرا شەرمەزارکردن پەلامار حووسی لەبان فڕۆکەخانەی عەدەن و پرسیار وەرد بکەرەیلی.

حکومەت شەرعی دووپات کرد کە پەلامارەگە ئەرا بان فڕۆکەخانەی عەدەن وە دوو مووشەک بالیستی و فڕۆکەی بیفڕۆکەوان، گیان ریوارەیل و کارمەنەیل خستەسە رخداری، وە هوشدارییداین لە هەڕەشەی پەلامارەیل حووسی ئەرا بیوەیی فڕۆکەوانی مەدەنی و هامشوو ئاسمانی و دەریایی ناودەوڵەتی.