شەفەق نیوز - وەدۊاچگن
رووژنامەی "جیرۆزالیم پۆست" ئیسرائیلی، رووژ سێشەممە، لە زوان وەرپرسیگ لە حکومەت سووری خەوەردا کە حکومەت وڵاتەگەی رخی چوود لەوە کە گرووپەیل چەکدار دروزی لە پارێزگای سوەیدا پەلاماریگ لەبان هیزەیل حکومەت لە رووژەیل ئایندە ئەنجام بیەن، و ئیسرائیل گاڵ ئۆپراسیۆنەگە دەێد و پاڵپشتی کەێد.
وەرپرسەگە وتیش، وەپەی رووژنامەگە، زانیارییەیل کە لە سوەیداوە رەسن دەسنشان ئەوە کەن کە گرووپەیل چەکدار شایەت خوەیان ئامادە کەن ئەرا پرۆسەیگ لەبان هیزەیل حکومەت سووری، وە دەسنشانکردن ئەوە کە گردەوبوین گرووپەیل چەکدار لە دریژایی کڕەیل وەیەکەوکەفتن نیگەرانی دیمەشق لە نووەوبۊن جەنگ لە باشوور سووریا ورووژان، و کەسایەتییەیل دروز لە پارێزگاگە لەی دۊاییە وە ئاشکرا راگەیانن کە پرۆسەیگ ئەرا گلەوهاوردن ئاوایەیل دروزی شایەت لەی نزیکە دەس پێ بکەێد.
وەپەی قسەی وەرپرسەگە، وەدۊاگەردینەیل ئاسمانی ئیسرائیلی لەبان سوەیدا و ناوچەیل دەورگردی زیایەو بۊنە، لە شان گەشتەیل وەدۊاگەردین فرەتر لەبان دیمەشق و باشوور سووریا، و وەرپرسەگە بانگەشەی ئەوەیش کرد کە هێلیکۆپتەریگ ئیسرائیلی لە سوەیدا نیشتەسە خوار و بڕیگ گەورە لە چەک و تەقەمەنی رادەست کردگە.
لە وەخت رمیان ئەسەدەو، ئیسرائیل چەن جاریگ دووپات لەبان رخە ئەمنییەیلی لەباوەت پیشهاتەیل لە باشوور سووریا کردگە و تەقەلا داگە ئەرا ریگریکردن لە هیزەیل دوژمنکار لە دانان بۊینیگ لە نزیک سنوورەیلی، لەناویانیش لەناو ئەو ناوچە دابڕیاگە کە لە ساڵ 1974 دروس کریا دۊای جەنگ "رووژ وەخشین"، و لە وەرانوەر یەیش دیمەشق ئەو پرۆسە سەربازییە ئیسرائیلییەیلە و وەردەوامبۊن بۊن هیزەیل ئیسرائیلی لەبان خاک سووری وە پیشێلکارییەیل ئەرا سەروەریی خوەی دانەێد.
ئاڵووزییەیل دەورگرد سوەیدا لە ساڵ گوزەشتە دەس کردنە بەرزەوبۊن، کە لە 13ی تەموز / یۆلیۆی 2025 جەنگ لە باشوور سووریا لە ناوەین سوپای سووری و هیزەیل بەدەوی لە لایگەو، و هیزەیل دروزی لە پارێزگای سوەیدا لە لایگ ترەک هەڵگیرسیان، و گرووپە دروزییەیل لەژیر دەسەی سوەیدای سەربازی رێکخریاۊن.
و لە 15ی تەموز / یۆلیۆی 2025، سوپای سووریا کۆنترۆڵ سوەیدا کرد، ئەوەگ هیشت دروزەیل لە ئیسرائیل داوا لە بنیامین نەتانیاهۆ سەرۆک وەزیرەیل بکەن ئەرا دەسوەردان و مسۆگەرکردن کشیانەوەی هیزەیل سووری لە پارێزگاگە، دۊای ئەوە ئیسرائیل شەپۆلیگ لە گورزەیل وەشانە بان ئامانجەیل سەربازی لە سووریا، لەناویانیش بارەگای دەسەی ئەرکان سووریا لە دیمەشق، و رەسبە ئاگربەسیگ وە ناوجیکردن ئەمریکی، و وەپەی ئی رێکخستنە سوپای سووری هیزەیلی لە سوەیدا کیشا وەدۊا لە وەختیگ هیز ئاسمانی ئیسرائیلی و دەسەی سوەیدای سەربازی پەلامارەیلیان لەبان سوپای سووریا وەسانن.
نەتانیاهۆ لەی دۊاییە ئاشکرا کرد کە لە ماوەی قەیرانەگە قسە وەرد ئەحمەد شەرع سەرۆک سووریا کردگە و هوشداری وەپی داگە کە "ئەگەر کۆمەڵکوژی مەدەنییە دروزەیل نەوسێد ئەوە ئیسرائیل گورزەیلی لەبان رژیم سووریا خەسەو کەێد"، وتیش کە گفتوگۆیگ بۊ "فرە کوڵ و فرە تون و کۆمەڵکوژییەگە وسیا".
سەرچەوەیگ نزیک لە رژیم سووریا ئەرا رووژنامەگە وت کە بڕیار نەتانیاهۆ ئەرا ئاشکراکردن قسەگە ئامانج ئەوە بۊە کە کۆنترۆڵ شەرع لەبان سووریا لاواز بکەێد، و ئیسرائیل تواێد "شەرع لاواز بوود تا بتۊنێد ئەوەگ تواێدەی لە سووریا وەجی بارێد".
وەرپرسیگ ئەمریکی ئەرا رووژنامەگە وت کە مەزەنە نیەکریەێد دانوسەنینەیل لە ناوەین ئیسرائیل و سووریا وەرجە هەڵوژاردنەیل ئیسرائیلی دەس وەپی بکەێدەو کە بڕیارە لە هەفتەی ئایندە وەڕیەو بچوود.