شەفەق نیوز - عەدەن
ئاژانس فەرمی خەوەری یەمەن (سەبا)، شەوەکی ئمڕوو چوارشەممە، راگەیان کۆمەڵەی "ئەنساروڵا"ی حووسی فڕۆکەخانەی ناودەوڵەتی عەدەن وە دوو مووشەک بالیستی و فڕۆکەی بیفڕۆکەوان (درۆن) بۆمبڕێژکریاگ وە ئامانج گرد.
وەپای ئاژانسەگە، یەکیگ لە مووشەکە بالیستییەیل لە نزیک جادەی نیشتن فڕۆکەخانەگە وەخوارکەفت، تەنیا چەن خوولەکیگ وەرجە نیشتن گەشتیگ ئاسمانی کە لە قاهیرەی پایتەخت مسڕەو هاتیە.
لە لای خوەیەوە، وەزارەت گوواستنەوەی یەمەن لە بەیاننامەیگ وە توندی شەرمەزار ئامانجگردن جادەی نیشتنەوەی فڕۆکەخانە و هۆڵ رێبوارەیل کرد، و دیاریکرد فڕۆکەخانەی ناودەوڵەتی عەدەن چوڵکریا و دوو فڕۆکە ئەرا شوونەیل دڵنیا کلکریان لە دویای پەلامارەگە.
وەزارەتەگە وت: دەسەڵاتەیل ناچار بوین رێڕەو گەشتیگ کڕ ئاسمانی یەمەن کە لە قاهیرەو هاتیاگ ئەرا فڕۆکەخانەی جەددە ئاڵشتبکەن، و ئاشکراکرد فڕۆکەخانەگە لە وەخت پەلامارەگە رێوارەیل و کارمەنەیلیگ لەخوەی گردوید کە چەوڕێ گەشت دەرچگن کردن، بیجگە لە بوین دوو فڕۆکە سەر وە کڕ ئاسمانی یەمەن و فرۆکەونی عەدەن لەبان زەوی فڕۆکەخانەگە.
وەزارەتەگە وە ئامانج گردن فڕۆکەخانەگە وە رخدار و هەڕەشەیگ ڕاستەوخوەی ئەرا ژیان مەدەنییەیل و بیوەیی هاتوچو ئاسمانی، و پێشێلکارییگ ئاشکرا ئەرا یاسا و نەریتەیل ناودەوڵەتی تایبەت وە پاراستن دامەزراوەیل مەدەنی لەقەڵەم دا.