شەفەق نیوز/ جیۆلۆجیست جیس فۆنیکس لە لێدوانیگ ئەرا تووڕ سی ئێن ئێن ئەمریکی ئاشکرا کرد کە زەویلەرزەی رووژ جمعە میانمار لە وزەی هاوتای ٣٣٤ تەقینەوەی بۆمب ئەتۆمی بویە.
فۆنیکس هوشداریدا لەوە کە هاتێ تەکانەیل زەویلەزەگە کە ٧.٧ پلە بوی تا چەن مانگیگ وەردەوام بوود لە ناوچەگە، وە لەوەرچەوگردن وەردەوامی لەیەکدان پارچەی تەکتۆنیکی هیندستان وەرد پلاک ئۆراسیا لە ژیر میانمار.
فۆنیکس وتیش: کاریگەرییەیل زەویلەرزەگە لە میانمار لەوەر وەردەوامی جەنگ ناوخۆیی وڵاتەگە ئاڵووزتر بویە وتیش: "ئەوەگ وە شیوەی ئاسایی رەوشیگ سەخت بویاتاد، نزیکە لە مەحاڵ".
میانمار وەدەس کاریگەرییەیل جەنگ ناوخۆیی خویناوی ناڵێد کە ماوەی چوار ساڵە وەردەوامە، دویای ئەوەگ کودەتایگ سەربازی خویناوی کە بویە مدوو ناکۆکی ناوەین هیزەیل ئەنجومەن سەربازی و گروپە یاخیبویەیل لە وڵاتەگە.
لە چوارچیوەیگ پەیوەندیدار، ئاژانس ڕۆیتەرز بڵاوکرد کە دەسەڵاتە ناوخۆییەیل راگەیانن کە ژمارەی قوربانیەیل زەویلەرزەگە ئەرا زیاتر لە هەزار کەس بەرزەو بوی. دەسەڵاتدارەیل کە بانگەوازیگ زویوەزوی ئەرا کۆمەڵگەی ناودەوڵەتی کردن ئەرا کلکردن هاوکاری، راگەیانن کە لەوەر زەویلەرزەگە هەزار و دوو کەس کوشیانە و دوو هەزار و 376 کەسیش زەخمدار بوینە.
جەنگ وەردەوام میانمار و بڕیان پەیوەندییەیل بویەسە مدوو ئاستەنگ ئەرا فامستن جیهان دەیشت لە کاریگەرییە راسگانیەیل زەویلەرزەگە.