شەفەق نیوز- وەدۊاچگن
سەرچەوەیلیگ ئاگادار ئاشکرا کردن کە لەلای کەمەو سێ کۆمپانیای پاڵاوتن نەفت هیندی و کۆمپانیایگ وزەی جەهانی گەورە وە تەمای دویرەوکەفتنن لە وەکارهاوردن ئەو کەشتییەیلە کە خریانەسە ناو لیست سیەی ئیرانی نووەگە، لەناویانیش پرۆسەیل بارکردن نەفت لە کەشتییگ ئەرا یەکیگ ترەک، لە رخ وەرەوڕۊبۊنیان ئەرا رێکارەیل ئیرانی یا رخباریەیل ئەمنی لە تەنگەی هورمز.
سەرچەوەیل، وەپای ئاژانس "رۆیتەرز"، وتن کە کۆمپانیایەیل ئی ریە گردنە وەر وە مدوو رخەیل ئەمنی، لە وەختیگ کۆمپانیاگەیل ترەک باس هوشدارییە ئیرانییەگە کەن و چەوەڕی دیاربوین چۊنیەتی جیوەجیکردنی کەن وەرجە دەرکردن بڕیارەیل لەباوەت کارەیلیان.
تاران، یەکشەممەی گوزەشتە، لیستیگ سیە راگەیانیۊد کە 45 کەشتی لەخوەی گرێد، و وت کە پێشێل یاساگەیل پەیوەندیدار وە رەدبۊن لە تەنگەی هورمز کردنە، وە هوشداریداین لە جیوەجیکردن رێکارەیل وەرانەور هەر کەشتییگ کە بارەیل وەگەردیان بوەێد.
بڕیارەگە لە وەختیگ تیەێد کە کۆتوبەندەیل ئیرانی لەبان جۊلەی دەریاوانی لەڕی تەنگەگە بەرزەو بۊنە، کە وە رێڕەویگ سەرەکی ئەرا دابینکردنەیل وزەی جەهانی هەژمار کریەێد، لە وەختیگ رێکارە نووەەیل، وەپای سەرچەوەیل، ئامانج دیرن لە پەکخستن ئەوەگ وە گەشتەیل گواستنەوەی مەکۆکی ناسیەێد کە وڵاتەیل کەنداوی بەرهەمهاور نەفت وەکاری تیەرن، لەناویانیش ئیمارات و سعودیە.
ئی پرۆسەیلە پشت وە ئەو بارهەڵگرەیلە بەسن کە نەفت لە کەنداو لەڕی تەنگەی هورمزەو بەن، وەرجە چووڵکردنی لە کەنداو عومان لەڕی پرۆسەیل بارکردن لە کەشتییگ ئەرا یەکیگ ترەک ئەرا ئەو بارهەڵگرەیلە کە وەرەو لای وەکارهاوەرەیل کووتایی چن.
سەرچەوەیل دیاری کردن کە ئی پرۆسەیلە هاوبەش بۊنە لە وەردەوامبۊن رشیان بەشیگ لە نەفت خوەرەڵات ناوڕاس وەرەو بازاڕەیل، وەگەرد کەمەوبۊن جۊلەی بارهەڵگری لەڕی تەنگەگە لە ئەنجام ئەو رێکارەیلە کە ئیران مەوقەی جەنگەگە چەسپانیە.
ئەوەگ وەپی ئۊشن "دەسەی تەنگەی کەنداو فارسی"، کە ئیران وەی دۊاییە ئەرا وەڕێوەبردن تەنگەگە دایمەزرانگە، وت کە ئەو کەشتییەیلە کە خریانەسە ناو لیستە سیەگە شایەت بکەفنە وەر جەزرەوە یا دەسگیرکردن و دەسوەسەرداگردن بارەیلیان بوون.
لەبان رویکردن بڕیگ لە کۆمپانیاگەیل وەرەو دویرەوکەفتن لەو کەشتییەیلە کە خریانەسە ناو لیستەگە، سەرچەوەیل وتن کە مەزەنە نیەکریەێد هەڕەشەیل ئیرانی بوونە مدوو وسانن پرۆسەیل بارکردن لە کەشتییگ ئەرا یەکیگ ترەک وە شیوەیگ فراوان، وەگەرد وەردەوامبۊن کۆمپانیاگەیل ترەک لە هەڵسەنگاندن رخباریەیل و پەرەسەنینەیل پەیوەندیدار وە جیوەجیکردن بڕیارەگە.