سەرچەوەیگ نزیک لە لێکۆڵینەوە ئەرا ئاژانس فرانس پرس وت: ئەو کابرا ک وەرجە دەسوەردان پولیس گریا، جانتايگ بویچگ وەپی بویە دوو مەخزەن یا سێیان پڕ لە فیشەک لەناوی بویە، و هەمیش پاکەتیگ فیشەک ٤٥ میلیمەتر ک لەلای کەمەو ٢٥ فیشەک لەناوی بویە.
لە خود وەختەگە، لێکۆڵینەوە ئەرا دیاریکردن ئەو هووکارەیلە ک نیشان ئەو پیاو ٦٩ ساڵە ئی کردەوە جیوەجی بکەێد وەردەوامە، ک وەرجەیە لەوەر پەلاماریگ نەتەوەپەرەسی داوا کریاگە.
ئیمانوێل ماکرۆن سەرۆک فەرەنسا نەفرەت لەو پەلامار بەدە کرد ک کوردەیل فەرەنسا کردە ئامانج، و وەداوایگ لە خوەی ئەوەسا فەرماندەی پولیس پیشوازی لە وەرپرسەیل کوردەیل فەرەنسا لە نیمەڕو ئمڕوو شەممە لە پاریس کەێد.
رویداوەگە لە جادەیگ نزیک ناوەندیگ کەلتوری کورد بوی لە گەڕەکیگ بازرگانی ک مەردم کورد سەردانی کەن، و ئەو کابرا تەقەکەرە دەسگیر کریا ک وەرجەیە تاوانەیلیگتر وە چەک کردیە.
دەسەڵاتەیل فەرەنسا هویردەکاریەیلیگ لەباوەت قوربانیەیل ئاشکرا نەکردن، ک جیراڵد دارمانان وەزیر ناوخوەی فەرەنسا وت: لەلای دەزگایل پولیس فەرەنسا نەناسیانە.
وەلێ ئەجیت بولات قسەکەر فەرمی ئەنجومەن دیموکراتی کوردی لە فەرەنسا وت: یەکیگ لە قوربانیەیل هونەرمەنیگ کورد دە و پەنابەر سیاسیە و لە تورکیا لەسەر هونەر داوا کریاگە، و دویەمەگە هاووڵاتییگ کورد ئاساییە، رووژانە سەردان ناوەندەگە کەێد، و دیاری کرد ک ژنیگیش هاناو قوربانیەیل داوای پەنابەری سیاسی کردگە باوجی دەسەڵاتەیل فەرەنسا وەپی نەیان.
لێکۆڵینەوە لە تاوانەیل کوشتن و تەقەلای کوشتن و کارەیل پەلامار وە چەک وە پیلان و شکانن یاسای چەک واز کریا.
تاوانبارەگە کییە؟
پولیس فەرەنسا وت: پیاویگ فەرەنسی وەناو "William M"، تەقە لە ناوەند کەلتوری کوردییگ و ساڵۆن سەرتاشی لەناوڕاس پاریس کردگە، ک رانندەی قەتار خانەنشینە، و گومان کریەێد پارەکە وە شمشیر داگەسە دوو کووچبەر لە پاریس، هەمیش گومان هەس چەن چادریگ لە چاردرەیل کووچبەرەیل لە پارک بیرسی ل لە خوەرهەڵات پاریس لە ٨ کانوون یەکەم ٢٠٢١ دڕیە.
هەمیش لە تەمووز گوزەشتە وە ١٢ مانگ زیندانی سزای دریا وە توومەت وەکارهاوردن چەک لە ساڵ ٢٠١٦.
هاندەر نەتەوەپەرەسی
وەلێ لە شوینیگتر، دارمانان وت: لەناو باوەتەیل هەواڵگری وڵاتەگە و وەریەوبەرایەتی ئاسایش ناوخوەیی نەناسریاگە.
و خانمە بانگەشەکار گشتی وت: نووڕین پەلاماریگ تیرۆری لەی مەوقە لە لێکۆڵینەوە دویر خریاگە.
باوگ تاوانبارەگە ک تەمەنی رەسێدە ٩٠ ساڵ، ئەرا ئاژانس فرانس پرس وت: کوڕەگەی لە شەوەکی رووژ رویداوەگە، هەنای لەماڵ دەرچگە هویچیگ نەوتیە، یە شیتە.
دارمانان دیاری کرد ک خوازیە پەلامار بیگانەیل بەێد و دیارە خوەی وەتەنیا ئی رەفتارە کردگە، وتیش: هەمیشە سەردان مەیدان دەسنیشان کردیە.
وتیش: دیار نییە ئەگەر بکوشەگە خوازیە ئی کەسەیلە بکوشێد، ئەوە دەسنشان کورد لەلی کردیە، باوجی مەردم کورد لە فەرەنسا باس پەلاماریگ سیاسی کردن.
لور بیکوو لە کۆنگرەیگ رووژنامەوانی وت: هاندەرەیل نەتەوەپەرەسی بەشیکە لەناو لێکۆڵینەوە، وتیش: لەی مەوقە چشتیگ نییە بچەسپنێد ک ئی پیاوە لایەنگر ئایدۆلۆژیایگ تونەڕەوە.
باوجی ئەنجومەن دیموکراتی کورد لە فەرەنسا وت: پەسەن نەکریاگە ک ئەو پەلامارە وە پەلاماریگ تیرۆری نەناسیەێد.
ئەجیت بولات قسەکەر فەرمی ئەنجومەنەگە لە کۆنگرەیگ رووژنامەوانی لە چیشتەخانەیگ وەدویری ١٠٠ مەتر لە شوین رویداوەگە وت: پەسەن نەکریاگە باس شیوەی تیرۆری لەی پەلامارە نەکریەێد یا بویشن تەنیا چالاکوانیگ لایەنگر راس هاتیە ئی تاوانە جیوەجی بکەێد.
وتیش: سیاسەت تورکیا لەباوەت بزووتنەوەی کورد وە شیوەیگ ئاشکرا هیلێد لەو باوەڕە بویمن ک ئی کوشتنەیلە سیاسیین، وتیش: سەرۆک تورکیا ڕەجەب تەییب ئەردۆگان و دەوڵەت تورکیا هانە پشت ئی کوشتنەیلە.
سەرچەوەیگ لە پولیس ئەرا ئاژانس فرانس پرس وت: رووژ جمعە کارەیلیگ تونوتیژی بویە و پولیس کەسیگ دەسگیر کردیە.
لە دەیشت؛ ئۆلاف شولتس باس ئەو تەقەکردنە وە کردەویگ دڵتەزن کرد، و ئەنتونی بلێر وەزیر دەرەوەی ئەمریکا سەرەخوەشی گەرمیگ کرد.