شەفەق نیوز/ عومەر بولات وەزیر بازرگانی تورکی، راگەیان کە نزیکەی ٤٠ هەزار سوری لە تورکیا ئەرا وڵات خوەیان گلەو خواردنە لە دویای رمیان ئەسەد لە سوریا لە ٨ دیسەمبەر گوزەشتە.

قسەیل بولات لەناو کۆنگرەیگ رووژنامەوانی هات لە سەردانی ئەرا دەروازەی سنووری جيلفيجوزو لە پارێزگای هاتای باشوور خوەرهەڵات تورکیا، کە نووڕیە ناوچەیگ تەیمانەیی، وەگورەی ئاژانس خەوەری ئەنادۆڵ تورکی.

بولات وتیش: 27,941 سوری وەر سێ دەروازەی سنووری لە هاتای لە ٨ی دیسەمبەر ساڵ گوزەشتەەو ئەرا وڵاتیان گلەو خواردنە.

وتیش: ئەو شمارە وەگەرد ئەو کەسەیلە کە لە دەروازەیلیگ ترەک توومار کریانە، شمارەی ئەو سوریەیلە کە گلەو خواردنە رەسێدە نزیکەی ٤٠ هەزار کەس.

بولات وتیش: پەنابەرەیل سوری لە تورکیا وەشیوەی گشتی خوازن رەوشەیل لە ناوچەیل رەسەنیان هەڵسەنگاندن بکەن وەرجە بڕیار گلەوخواردن.

ئەرا ئاسانکردن ئی کارە، وەزارەت ناوخۆی تورکیا ریکار نوویگ پیشکەش کرد کە ری وە سوریەیل دەێد لە ماوەی شەش مانگ سێ گلە سەردان ناوچەیل خوەیان بکەن.

بولات وتیش: باوەڕ دیرم ئی گامە دەسمیەتی دەێد پەنابەرەیل زویتر گلەو بخوەن.