شەفەق نیوز - وەدۊاچگن

حکومەت مالیزی قەیەغەی وەکارهاوردن ئەپلیکەیشن رینیشاندەر "وەیز" (Waze)، سەروە کۆمپانیای "ئەلفا بێت" لەبان فەرمانبەرەیل کەرت گشتی کرد، وە مدوو رخەیل ئەمنی پەیوەندیدار وە رەچەڵەک ئەپلیکەیشنەگە لە ئیسرائیل، وەپەی ئەوەگ دەسەڵاتەیل مالیزی راگەیاننە.

 ئەنوەر ئیبراهیم سەرۆک وەزیرەیل مالیزی وت، کە حکومەتەگە وەدۊاچگن لە رخباریە ئەمنییە چەوڕیکریاگەیل کە لە وەکارهاوردن ئەپلیکەیشنەگە پەیا بوود کەێد، کە وەسفی کرد وە ئەوەگ "ملکەچە ئەرا یاساگان ئیسرائیلی"، وە دووپاتکردن ئەوە کە وڵاتەگەی نیەتۊنێد کەمتەرخەمی بکەێد وەختیگ باوەتەگە پەیوەندی وە ئاسایش داتا و ناسنامەی هاووڵاتییەیلەو دیرێد.

 ئەنوەر لە بڵاوکریایگ لەبان پلاتفۆرم "فەیسبووک"، دۊای سەرۆکایەتیکردن دیدار لیژنەی نیشتمانی ئەرا ئاسایش ئەلکترۆنی وت کە پاراستن داتایەیل لەپیشینە، وەبی ئەوەگ وردەکارییەیل دیاریکریاگ پیشکەش بکەێد لەباوەت ئەو رخباریەیلە کە پاڵ وە حکومەتەگە نانە ئەرا گردنەوەر ئی ریکارە.

 سەرۆک وەزیرەیل ئەرکدار وە وەکارهاوردن ئەپلیکەیشن "تۆگۆ"، کە ئەپلیکەیشنیگ ناوخۆییە ئەرا نەخشەیل کە دەسەی ریوبانەیل مالیزی وەرەونوا چگە، لەجیای "وەیز".

لەی چوارچیوە، شەمس ئەلئەزری ئەبو بەکر گەورەی ئەمیندارییەیل حکومەت مالیزی وت، لە نامەیگ کە میژووەگەی وەرەو سێشەممە گلەو خوەێد و ئەرا سەرۆک دامەزراوە حکومەتییەیل مل کریاگە، کە گشت فەرمانبەرە مەدەنییەیل قەیەغەن لە وەکارهاوردن ئەپلیکەیشنەگە، وە رووشنکردن ئەوە کە قەیەغەکردنەگە وەجیوەجیکردن بڕیاریگ هاتگە کە لە ناو ئەو دیوارە کە ئەنوەر سەرۆکایەتیی کرد، و دەسوەجی کەفتەسە بوار جیوەجیکردن.

 وەرپرسیگ لە نویسینگەی سەرۆک وەزیرەیل راسی نامەگە دووپات کرد، وەپەی ئەوەگ ئاژانس "رۆیتەرز" بڵاوی کرد.

 ئەپلیکەیشن "وەیز"، کە لە ئیسرائیل دامەزریاگە، نیشانەی مانگە دەسکردەیل و ئەو داتایەیلە وەکار تیەرێد کە رانندەیل گردیەو کەن ئەرا پیشکەشکردن زانیاری دەسوەجی لەباوەت جموجۊل هاتوچو، و کۆمپانیای "گووگڵ"، کە خاوەنداریەتیی ئەرا "ئەلفا بێت" گلەو خوەێد، دەس گردە بان ئەپلیکەیشنەگە لە ساڵ 2013 لە وەرانوەر نزیکەی یەک ملیار دۆلار.

 مالیزیا، کە زۆرینەی مسوڵمانە، وە یەکیگ لە دیارترین پاڵپشتیکەرەیل ئەرا دۆسیەی فەڵەستینی دانریەێد، و هیچ پەیوەندییگ دیپلۆماسی وەرد ئیسرائیل نەیرێد.