شەفەق نیوز / رووژنامەی دەیلی مەیل بەریتانی،  ئاشکرای کردەوەی دڵتەزنیگ کرد ک لەناو یەکیگ لە خەسخانەیل چارەکردن هوکارەبۊیەیل هووشبەری لە کابوڵ پایتەخت ئەفغانستان.  

رووژنامەگە لە راپۆرتیگ وت: کەسیل ناو یەکیگ لە ناوەندەیل خاسەوکردن مەردم لە هووشبەری، لەژیر دەسەڵات تاڵیبان،  هانە رەوشەیل فرە سەختیگ لە وەرسگی، ک هەر سێ کەس لەبان یەک شەوخەف خەفن، و خواردنیش کەمە، و جاروباریش هەر خواردن نییە، ک ناچار بوون گیا و پشی بخوەن، تا رەسینە خواردن ئایەمیش. 

دۊای ٦ مانگ لە زاڵبۊن تاڵیبان لەبان ئەفغانستان،  هەزاران لە وەکارهاورەیل هووشبەری دەسگیر کردن، و لەناو خەسەخانەیل گیریان دان، تا ماوەی سێ مانگ تا ژەهرەگە لەلەشیان دەرچوود. 

کەسەیلیگ لەناو خەسەخانە زیندانەگە باس کردن ک بەشیگ لەلیان وەرجە رەسینیان ئەرا خەسەخانە کوشیانە، و یە چەن مانگیگە خواردن فرە کەمە، و پزشکەیلە هەر یەک رووژ نیم نان وەپیان دەن، باوجی ئەوەیش وەدەسیان نێکەفێد، و بەشیگیان ناچار بوود گیا بخوەن نەگ تا لە ورسگی تیریان بکەێد، وەلێ تا لە ژان ناوزگیان ئاسوودە بوون.  

یەکیگ لەو کەسەیلە ک خاسەو بۊیە، ئەرا رووژنامەوانەیل دانیمارکی وت: پیاویگ کوشتنە، و ئاگر کردنەسەو و ناوزگ پیاوەگە خواردنە. 

و یەکیگیش وت: لەوەر وەرسگی پشییگ خواردنە.