شەفەق نیوز/ ئاژانس خەوەری دەزگای ئیزگە و تەلەڤزیۆن ئیرانی، ئمڕوو شەممە، مردن پەنج کەس لەیەک خیزان راگەیان، ک لە شار نەجەف ئاباد لە پارێزگای ئەسفەهان ناوڕاس ئیران خوەیان دانەسە سێدارە.  

تووڕ "ئیرەم" لە زوان ئاژانس "جوان" وت: دویەکە جمعە، دەسەڵاتەیل تەرم پەنج کەس لەیەک خانوادە لە شار نەجەف ئاباد لە پارێزگای ئەسفەهان پەیا کردن.  

ئاژانسەگە وتیش: ئەو کەسەیلە ک خوەیان کوشتنە، ژنیگ ودوو دویەت وکوڕیگ ومناڵیگ بوینە، و گشتیان لەیەک خیزانن، وخوەیان دانەسە سێدارە.  

وتیش: وەگورەی بەڵگەیل، یە چەن هەفتەیگە ئەوە رویدایە.  

لەزوان سەرچەوەیلیگ ئەرا ئاژانسە ئیرانیەگە، کەسیگ دەسگیر کریایە دەسی هاناو کارەگە، وهیمان هووکار مردن ئەو پەنج کەسە هاناو لێکۆڵینەوە.   

لە کانوون دویەم گوزەشتە، خانمە سکرتێر "دەسەی نواگردن خوەیکوشتن" لە کۆمەڵگەی زانستی پزشکەیل دروینی لە ئیران "مەریەم مەعسومی" وت: لە ساڵ ٢٠٠٤ ئاست خوەیکوشتن لە زیایبوین بوی، و بەرزترین ئاست خوەیکوشتن لەناو چین کراکارەیل و بیکارەیل وژن ماڵەیل بوی، ک ئەوە نشان دەێد ک رەوش ئابووری نائارام هووکار خوەیکوشتنە.  

مەعسومی وتیش " هەر ساڵیگ ١٠٠ هەزار کەس لە وڵاتەگە خوەیان کوشن، ویە نووترین ئامارە لەلایەن وەزارەت ناوخۆ.