شەفەق نیوز- مۆسکۆ

کرملین، ئمڕوو چوارشەممە، خەوەردا لە گردەوبوینیگ سێانی مەزەنەکریاگ کە سەرۆک رووسی ڤلادیمیر پوتین و هاوتا ئەمریکییەگەی دۆناڵد ترەمپ و سەرۆک چینی شی جینپینگ گردەو کەێد، لە مانگ تشرین دۊیەم/ نۆڤەمبەر ئایەندە.

 بڕیارە مەکۆی هاوکاری ئابووری ئەرا ئاسیا و زەریای ئارام "ئاپێک" لۊتکەگەی لە شار شێنجێن چینی لە رووژەیل 18 و 19 تشرین دۊیەم/ نۆڤەمبەر ئایەندە ساز بکەێد.

 کرملین وتیش کە پوتین بەشداری لە لۊتکەگە کەێد، لە وەختیگ کۆشک چەرمگ هێمان خەوەر نەیاگە ئایا ترەمپ ئامادەی بوود یا نە.

 لە وەڵام پرسیاریگ لەباوەت ئەوەگ ئایا ترەمپ و پوتین، ماوەی پەیوەندییە تەلەفۆنییەگەیان دۊکە سێشەممە، باس لە هویرەی بەسانن گردەوبوینیگ سێانی لە شێنجێن کردنە، قسەکەر وە ناو کرملین دمیتری پێسکۆڤ وت: "بی گومان".

 پێسکۆڤ ئەرا رووژنامەنویسەیل کە لەناویانیش رووژنامەنویسەیل ئاژانس "فرانس پرێس" وت کە "وەرجەیە ئی ئەگەرە خریاسە وەر باس، و دەرفەتیگ هەس ئەرا بەسانن کووبۊنەوەیگ ئیسە".

 دامەزرانن مەکۆی "ئاپێک" حکومەتی ناودەوڵەتی گلەو خوێدەو ئەرا هەشتایەیل سەدەی گوزەشتە، و چەن دەوڵەتیگ لەخوەی گرێد، لەناویانیش رووسیا و چین و ویلایەتە یەکگرتگەیل، و وە یەکیگ لە دیارترین چوارچیوەیل هاوکاری ئابووری لە ناوچەی ئاسیا و زەریای ئارام هەژمار کریەێد.

 لۊتکەی تشرین دۊیەم/ نۆڤەمبەر لە سای فشارەیل ئەمریکی لەبان رووسیا ئەرا کووتاییهاوردن وە جەنگ لە ئۆکرانیا تیەێد، لە وەختیگ پەیوەندییەیل لەناوەین مۆسکۆ و پەکین قایمتر بوون.

 دوو کلکریای ئەرا ترەمپ هەفتەی گوزەشتە سەردان هەردوگ مۆسکۆ و کیێڤ کردن، باوجی خەوەر نەیان لە وەدەسهاوردن هیچ پیشکەفتنیگ وەرچەو لەبان ری کووتاییهاوردن وە جەنگ لە ئۆکرانیا.