شەفەق نیوز - تەهران

سێرگی لاڤرۆڤ وەزیر دەیشت رووسیا، رووژ دووشەممە، دووپات کرد کە وڵاتەگەی ئامادەس ئەرا دەسمیەتیداین لە رەسین وە چارەسەرەیل پەسەنکریاگ ئەرا ململانێ ئەمریکی ئیرانی، لە وەختیگ بانگەواز ئەرا دیالۆگیگ راسەوخۆ لە ناوچەگە وە بەشداریکردن عراق کرد.

 لاڤرۆڤ، دۊای گفتوگۆیەیلیگ کە ئەنجامیان دا وەرد عەباس عەراقچی وەزیر دەیشت ئیرانی، لە تەهران، وت: "ئیمە ئەو رەوشە کە لە پەلامار ئەمریکی - ئیسرائیلی بی دەسپیچگ لەبان ئیران پەیا بۊە شیەو کردیمن، و دووارە دووپات لەبان ئامادەبۊن رووسیا کردیمن ئەرا یارمەتیداین لە پەیاکردن چارەسەرەیل پەسەنکریاگ ئەرا هەردوگ لا ئەرا دەرچگن لەی قەیران دروسکریاگە".

 لاڤرۆڤ وەرجە یە دووپاتی کردۊد کە مۆسکۆ نوەڕێدە "چەمک مسۆگەرکردن ئاسایش گەلەدەسی لە کەنداو" نووەوکریاگ جۊر بەشدارییگ لەلیەوە لە یەکلاییکردن و دروسکردن رەوشەیل ئەرا دیالۆگ راسەوخۆ لە ناوەین وڵاتەیل ناوچەگە.

 لاڤرۆڤ دووپات کردە بان ئەوە کە هەوەجەس وڵاتەیل هاوسنوور (لەبان کەنداو) قسەی یەکلاییکەر وەپیان بڕەسێد لە دیاریکردن ریەیل مسۆگەرکردن گەشەپیداین ئارام ئەرا ئی ناوچەی ستراتیژییە زینگە لە جەهان، و دووپات کرد کە چەمک رووسیا ئەرا ئاسایش لە کەنداو ئامانج دیرێد ئەرا ئامادەکردن رەوشەیل ئەرا دیالۆگیگ راسەوخۆ لە ناوەین وڵاتەیل کەنداو و هاوسایەیلی جویر عراق و ئوردن.

 عەباس عەراقچی وەزیر دەیشت ئیرانی پیشوازی لە سێرگی لاڤرۆڤ هاوتا رووسییەی کرد لە بارەگای وەزارەت دەیشت لە تەهران، وەشوین رەسینی ئمڕوو لە سەرەدانیگ کار کە لە شانشین بەحرەینەو هاتۊد.