شەفەق نيوز- بەيروت
میدیایەیل راگەیانن فەرمی لوبنان، ئمڕوو شەممە، خەوەردان لە کوشیان کەسیگ لە ئەنجام گورزیگ ئاسمانی وەلایەن درۆنیگ ئیسرائیلی وەبان ماشینەگەی لەبان ری توێری – سريفا لە قەزای سوور باشوور وڵاتەگە.
ئاژانس خەوەری لوبنانی لە زوان بنکەی فریاکەفتن تەندروسی گشتی لوبنان وت: فرۆکەی بێفڕۆکەوان ئیسرائیل گورزیگ ئەرا ماشینیگ لەبان ری توێری – سريفا لە قەزای سوور وەشیا کە شەهیدی کرد.
رووژ جمعە، کوشیان کەسیگ وە گورز ئیسرائیل وەبان ماشینیگ لە ناوچەی برعشيت لە قەزای بنت جبيل (باشوور) راگەیان، لە وەختیگ ئەندام ئەنجومەن شارەوانی زهیرە (باشوور) بسام سويد لە ئەنجام تەقەکردن سوپا زەخمدار بوی.
لەلای خوەییش، ئەفیخای ئەدرعی قسەکەر سوپای ئیسرائیل لەبان ئێکس وت: ئەو گورزە وەبان ناوچەی برعشيت بویە مدوو کوشیان محمد حەسەن قەسان، وەرپرس هاز مرۆیی لە کەرت ناوچەی بنت جبێل لە حزبولڵا.
هیچ قسەیگ لەلایەن حزبولڵای لوبنان لەی باوەتە دەرنەچگ.