شەفەق نيوز/ کەرت ساسكاتشوان کەنەدا کارەساتیگ ژینگەیی و ئەمنی وەخوەی دوینێد، دویای ئەوە کە ئاگر دارستانەیل وەرەو ناوچەیل فراوانیگ وڵاوە بوی، و سەدان ماڵ ویران کرد، و هەزاران کەسیش ناچار وەجیهیشتن ماڵەیل کرد، لەناو زیڕە و تاسیان.

حکومەت کەرتەگە ئامادەباشی راگەیان دویای ئەوە کە ئاگرەگە لە چەن شوینیگ لە بەجەر دەرچگ، و تا ئیسە زیاتر لە 400 ماڵ و بینا ویران کردگە، و شمارەی ئاوارەبویەیل لە 9000 کەس رەد کرد، لە گەنترین ئاوارەبوین لەی ناوچە.

سکوت مۆ سەرۆک وەزیرەیل ناوخوەیی مەزەنە کرد شمارەی ئەو کەسەیلە ماڵ چووڵ بکەن بڕەسێدە 15 هەزار کەس، وەگەرد وەردەوامی وڵاوەبوین ئاگرەیل، لە ساڵ کەشوهەوای هشک و وای گورج، کە رەنج تیمەیل وەرگری شارستانی بیوەر کەێد.

وەگورەی نووترین راپۆرتەیل ئاژانس بیوەیی گشتی لە ساسكاتشوان، هیمان 21 شوین ئاگر بڵویزە کەێد، لەناویان 8 ئاگر کە وە "دەیشت کۆنتڕۆڵ" دریانە قەڵەم، کە نوقڵاتەی کارەساتیگ گەورەتر لەی رووژەیل بانانە دەێد.

ئمساڵ وەرز ئاگرەیل زویتر دەسوەپی کرد، کە یەکەمین ئاگر لە کورت ئەلبیرتا لە رووژ 3ی ئایار هیز گرد، و وەرەو باکوور و خوەرهەڵات درویژەو بوی، تا رەسیە ناوچەیلیگ لە مانيتوبا کە زیاتر لە 42 هەزار هكتار زەوی لەناوی سزان.