شه‌فه‌ق نيوز/ فره‌نسا له‌باره‌ى بڕيار تايبه‌ت وه سوريا داوا له ئه‌ندامه‌يل ئاسايش ناوده‌وڵه‌تى كرد وه نيازپاكييه‌و دانيشتن ئه‌نجام بيه‌ێد ك ئه‌را يه‌كه‌مجار دوسيه‌ى چه‌ك كيمياوى و مقه‌يه‌تيكردن مه‌ده‌نيه‌يل بگرێده خوه‌ى وه‌ل ره‌سين ئه‌را ريككه‌فتنيگ سياسى.
له‌ى باوه‌ته‌و، فرانسوا ديلاتر باڵوێز فره‌نسا له نه‌ته‌وه‌يل يه‌كگرتگ ئاشكراى دانيشتن يه‌كه‌م شاره‌زايه‌يل كرد ك نوێنه‌رايه‌تى ئه‌ندامه‌يل ئه‌نجومه‌ن ئه‌كه‌ن و باس له‌وه‌يش كرد ئه‌و دانيشتنه‌يله بايه‌سه وه نيازپاكى و له كه‌شيگ گونجياگ ئه‌نجام بگرێد، وه‌لێ وه‌ختيگ دياريكرياێ نيه ئه‌را خستنه‌ڕوى پرووژه بڕياره‌گه ئه‌را ده‌نگداين.
جى باسه، ديلاتر ئه‌را رووژنامه‌نويسه‌يل وت: ئه‌وه‌گ ئه‌خوازيم ئه‌نجامى بيه‌يم ئه‌وه‌سه ده‌س بكريه‌ێده دانيشتنيگ به‌رهه‌مدار و راسكانى وه‌ل گشت ئه‌ندامه‌يل ئه‌نجومه‌ن نوێنه‌ره‌يل له‌وه‌ر ئه‌وه‌گ ئه‌نجومه‌نه‌گه له‌نوو كاريگ وه‌جه‌م بكا ئه‌را كيشه‌ى سوريا.