شەفەق نیوز/ هیزەیل سوریای دیموکرات "هەسەدە"، ئمڕوو یەکشەممە، خەوەردا لە کوشیان 7 لە ئەندامەیبی لەناو جەنگ بە ناوچەیل باکوور و خوەرهەڵات سوریا، دووپات کرد لە کوشیان 23 لە جەنگاوەرەیل باڵەیل لایەنگر تورکیا.

هەسەدە لە بەیاننامەیگ لەبان ماڵپەڕ ئەلیکترۆنیی وت: شمارەیگ لە جەنگاوەرەیل ئیمە لە وەرخودان وەردەوام لە نواگیریکردن پەلامارەیل داگیرکاری تورکیا و لایەنگرەیلی و وەرانوەر شانەیل ریخریاگ داعش کوشیان.

وتیش: گشت پەلامارەیلیان وەلایەن جەنگاوەرەیل ئیمە شکست وەپییان تیەێد، کە زەرەدەیل گەورەیگ لە شمارە و عەتاد وەپییان رەسنن، دووپات لە وەردەوامی خەبات و جیوەجیکردن ئارەزوو و ئامانجەیل شەهیدەیلمان و گەلمان لە ئازادی و مقیەتیکردن ئاسایش و ئارامی ناوچەیلمان.

وتیش: لە بەرەیل باشوور خوەرهەڵات ریف مەنبج جەنگ سەختیگ بوی، لەناوی 23 لە جەنگاوەرەیل باڵەیل لایەنگر تورکیا کوشیان، و 36 کەسیانیس زەخمدار بوی.