شەفەق نیوز/ لە ئەنجام گورزیگ ئیسرائیل، ئمڕوو دووشەممە، لە باشوور لوبنان، 3 کەس کوشیان، وەگورەی راگەیانن وەزارەت تەندروسی لوبنان.

ناوەند ئۆپراسیۆنەیل فریاکەفتن لە وەزارەت تەندروسی گشتی، لە بەیاننامەیگ وت: گورز دوژمن ئیسرائیلی وەبان ناوسوب یەحمور لە پارێزگای تەبەتیە، بویە هوکار کوشیان کەسیگ و زەخمداری سێ کەس ترەک.

ئاژانس راگەیانن نیشتمانی وت: درۆنیگ ئیسرائیلی ئمڕوو پەلاماریگ ئاسمانی جیوەجی کرد، کە گورزیگ ئاسمانی وە مووشەک ماتووڕسکڵیگ لەبان ری گەرەک بەیدەر لە ناوچەی یەحمور شقیف کردە ئامانج، کە دوو کەس لە کووڵی بوینە، و ماشینیگ لەو شوینە ریوار بویە ئەویش تویش پەراشەی مووشەک هات و ئاگر گرد، و سووپەر مارکیتیگ لە ئەنجام ئەو گورزە زەرد وەپی رەسی و ئاگر لەناوی هیز گرد.

 وەگورەی ئاژانسەگە، تیمەیل فریاکەفتن زەخمدارەیل هەڵگردن، و تیمەیل وەرگری شارستانی لوبنانی و دەسەی تەندروسی ئەو ئاگرەیلە کپەو کردن. 

رێککەفتن ئاگربەسی لە نۆڤەمبەر گوزەشتە ناوەین لوبنان و ئیسرائیل رەسیە ئاست جیوەجیکردن، وە مەرجیگ ئیسرائیل دویای 60 رووژ لە زەویەیل لوبنان دەرچوود، و ماوەی جیوەجیکردن رێککەفتنەگە تا 18ی فیبرایەر گوزەشتە درویژەو کریا.

ئیسرائیل وە خاڵەیل ئەو رێککەفتنە پابەند نەوی، کە هیمان هیزەیلی لە پەنج خاڵ لە باشوور لوبنان هەن.