شەفەق نیوز/ فەوج 120 سەربازی فەرەنسی چاد وەجیهیشت، یەیش دەسکردن وە کیشانەوەی هیزەیل فەرەنسا بوی لە یەکیگ لە دوایین کۆلۆنیەیل وەرین کە تا ئیسەیش ئامادەیی سەربازی لەورا بویە.

 ئاژانس ڕۆیتەرز وت: هیزەیل فەرەنسا سوار فڕۆکەگەیان بوین و فڕۆکەخانەی نجامێنا وەجی هیشتن، یەیش دویای بڕیارە لەناکاوەگەی چاد لە ٢٨ ئی مانگە ئەرا کۆتاییهاوردن وە ڕێککەفتن هاوکاری وەرگری وەرد پاریس.

 ئی گام فەرەنسا دویای ئەوە تیەێد کە لەماوەی چەن ساڵ گوزەشتە فەرەنسا هیزەیلی لە مالی و بورکینا فاسۆ و نیجەر کیشاسەو.

 سەرەتای ئی مانگە پڕۆسەی کیشانەوەگە وە فەرمی دەسوەپی کرد وە چگن دوو فڕۆکەی جەنگی میراج فەرەنسی لە ١٠ی کانوون دویەم.

 ئی چگنە کۆتایی دەیان ساڵەی بویین سەربازی فەرەنسا لە ناوچەی ساحل و کۆتایی وە ئۆپەراسیۆنە سەربازییە ڕاستەوخۆیل فەرەنسا دژ وە چەکدارەیل ناوچەگە تیەرێد.

 جی باسە کە لە ٢٨ ئی مانگە حکومەت چاد کە هاوپەیمان سەرەکی خوەرئاوا بوی لە جەنگ دژ چەکدارەیل ناوچەگە، لە گامیگ چەوڕینەکریای ڕێککەفتن هاوکاریی وەرگریی وەرد فەرەنسا هەڵوەشانەو کە وەرپرسەیل فەرەنسا تویش سەرسوڕمان کرد.

 هیمان واژوو لەبان مەرجەیل کیشانەوەگە نەکریاس، و دیار نییە ئایا هویچ هیزیگ فەرەنسی لە وڵات ئەفریقای ناوڕاس مینێدەو یا نە، تا ئیسە ڕێکنەکەفتنە، بەڵام یەکەمین فڕۆکە جەنگییەیل میراج رووژ سێشەممە ئەرا فەرەنسا گلەو خواردن.

 قسەکەر سوپا، کۆلۆنیەیل گویلۆم ڤێرنێت راگەیان کە "یە سەرەتای گلەوخواردن ئامێرە فەرەنسییەیلە کە لە شار نجامێنا جیگیر کریاوێن".

 هیمان فەرەنسا نزیکەی هەزار سەربازی لە چاد مەنیە، و مەزەنە کریەێد کیشانەوەی تەواو چەن هەفتەیگ بکیشێد.

 ڤێرنێت وتیش: دانان خشتەی وەخت ئەرا کەمکردن ئۆپەراسیۆنە سەربازییەیل چەن هەفتەیگ خوازێد تا هەردوگ وڵات بتوەنن کۆتایی بارن.