شەفەق نيوز/ عەباس عراقچی وەزیر دەیشت ئیران، ئمڕوو چوارشەممە، دووپات کرد کە رێککەفتن ئەتۆمی ساڵ 2015 هیمان پابەندبوین سەرەکی لەلایەن ئیران هاناوی، وتیش: ئەمریکا سوود لەلی گرد، هەرچەن لە 2018 خوەی لەلی کیشادەو.

عراقچی لە پۆستیگ لەبان پلاتفۆرم ئێکس نویسان: ئیران پابەندبوین ئەتۆمی خوەی نەشکانیە، وتیش: تەقەلای مینەکردن یا بەرهەمکردن یا داشتن چەک ئەتۆمی وە هویچ رەوشیگ نیەیمن.

 وتیش: کارلێک دیبلۆماسی گوزەشتە کارایی خوەی چەسپان، و توەنێد بوودە گونجیاگترین رییگ ئەرا چارەکردن پرسەیل گیرهاتگ، دووپات کرد کە چارەسەری سەربازی ئەرا قەیران ئەتۆمی ئیرانی نییە.

 عراقچی وتیش: شکست سەربازی ئەمریکی لە ناوچەگە زیاتر لە هەفت تریلیۆن دۆلار خستە بان ئیدارەیل وەرین، دووپات کرد کە ئەزموونەیل ئەوە چەسپانن کە دانوسەنین لە گشتی راسترە.

 جی باسە کە دۆناڵد ترەمپ سەرۆک ئەمریکا، ئاشکرا کرد کە پەیام ئەرا ریبەر ئیرانی کلکردیە لەباوەت رەسین وە رێککەفتنیگ لەبان بەرنامەی ئەتۆمی.

ترەمپ دیاری کرد کە واشینتۆن نووڕێدە دوو ری ئەرا چارەکردن قەیرانەگە؛ سەربازی، و دیبلۆماسی، وەلێ گرنگی دەێد وە دانوسەنین، لە دەسنیشانکردن وەردەوامی تەقەلایل دیبلۆماسی ئەرا چارەکردن ناکۆکیەیل ئەتۆمی.

 جی باسە کە لە ساڵ 2015، هەرلە ئیران و بەریتانیا و ئەڵمانیا و چین و رووسیا و ئەمریکا و فەرەنسا، رەسینە رێککەفتن سووککردن سزایەیل وەبان تەهران وەرانوەر چەسپانن پاوەن لەبان بەرنامەی ئەتۆمیی.

لە ئایار  2018، ئەمریکا لە یەکەمین دەسەڵات ترەمپ لە رێککەفتنەگە خوەی کیشا، و دووارە سزایەیل وەبان ئیران چەسپان، کە هیشت ئیران پابەندیەیل ئەتۆمیی کەمەو بکەێد، و واز لە پاوەنەیلی بارێد.