شەفەق نیوز/ ئاژانس رۆیتەرز، ئمڕوو شەممە، خەوەردا کە بەشیگ لە دانیشتگەیل ساحل سوریا کە پەنا وە سەربازگەی حمێمیم رووسی لە لازقیە بردن، هەناێ لە کوشتن و بڕین واینە، دویای ئەوە کە لە کەسوکارەیلیان دڵنیا بوین کە ناوچەگە ئارامەو بوی، دەسکردن وە گلەوخواردن ئەرا ئاوایەیلیان.

رەنا، دویەتیگ سوری لە تەمەن 34 ساڵان وت: وەرد خیزانەگەی لە ماڵیان لە ئاوای سنبور لە ناوچەی جبلە لە ریف لازقیە بوین، و دویای هەڵسیانیان لە خەو دەنگ تەقە ژنەفتن، کە لەو شوینە واین و یەکەم جار ئەرا شوینیگ ترەک لە ئاوایەگە چگن، ئیجا وەگەرد مەردمیگ ترەک روی وەرەو سەربازگەی حمێمیم وەدویری 11 کیلۆمەتر کردن.

  دیاری کرد کە رووژ پەنجشەممەی گوزەشتە ئەرا ئاوای سنبور کلەو خواردن دویای ئەوە کە براگەی دڵنیای کرد کە ناوچەگە ئارامە، و هیزەیل ئەمنی حکومەت هانە ئەو ناوە، وەلێ هیمان بڕیگ لە ئاوارەیل هانە ناو ئەو سەربازگەی رووسیە کە هیمان دوودڵن لە دەرچگن.

وتیش: وەڕاسیەو رخیگ هەس، وەلێ خواد بمەر خاسترەو بوود، ئومید گەورەیگ دیریمن خاسەو بوود.

رۆیتەرز لە زوان رووژنامەوانویلی کە رووژ پەنجشەممەی گوزەشتە سەردان ساحل سوریا کردن وەگەرد ئەندامەیل ئەمنی حکومەتی، وت: فرە ماڵ و دوکان دینە کەفتنەسە وەر سزانن و تاڵان، وەگەرد ئاوایەیل نیمچە چووڵ.

رووزنامەزانەیل چەویان کەفتە پیاییگ لەی دویایی ئەرا ئاوای سنبور گلەو خواردوێد، و ئەرا ئەو ماڵە بردەیان مە وت: لەیرا لاشەی برا و برازای دیە، وەلێ ناو خوەی ئاشکرا نەکرد.

 رووژ پەنجشەممەی گوزەشتە، ماریا زاخارۆفا خانمە قسەکەر وەزارەت دەیشت رووسیا وت: سەربازگەی حمێمیم پیشوازی لە نزیکەی 9 هەزار ئاوارە کرد، فرەیان ژن و مناڵ بوین، لەوانەگ لەدەس کوشتن و بڕین واینە وەمینەی پەناگەیگ ئارام.