شه‌فه‌ق نيوز/ شيه‌وكردنيگ ئاشكراى ئه‌وه كرد ك نزيكه‌ى نيم مليۆن كه‌س وه‌شيواز سه‌خت له عراق و ئه‌فغانستان و پاكستان كوشيانه له‌وه‌حت جه‌نگ له‌بان تيرۆر ك له‌لايه‌ن وڵاته‌يل يه‌كگرتگ ئه‌مريكاوه ده‌س وه‌پى كريا دوياى 11ى سپته‌مبه‌ر 2001.
په‌يمانگاى واتسۆن ئه‌را كاروبار ناوده‌وڵه‌تى و گشتى سه‌ر وه زانكۆى براون، شماره‌ى ئه‌و كوشياگه‌يله له‌ناونى 480,000 و507,000 كه‌س باسكرد، وه‌لێ ئاماژه وه‌يه‌يش كردگه شايه‌ت شماره راسكانيه‌گه زياتر بدێ.
په‌يمانگاى ناوبرياگ له دراسه‌ته‌گه‌ێ وت: شماره‌ى ئه‌و كه‌سه‌يله ك كوشيانه له عراق ها ناونى 182,272 و204,575 كه‌س مه‌ده‌نى و 38,480 كه‌س له ئه‌فغانستان و 23,372 كه‌س له پاكستان.
جى باسه، ئاماژه وه‌يه‌يش كرد ك نزيكه‌ى 7 هه‌زار سه‌رباز ئه‌مريكييش له عراق و ئه‌فغانستان كوشيانه.