شەفەق نیوز- وەدۊاچگن

دەسەی پرۆسەیل بازرگانی دەریایی بەریتانی، ئمڕوو سێشەممە، خەوەردا لە وەرگردن راپۆرتیگ لەباوەت تویشهاتن کەشتییگ وە تەقەمەنییگ نەناسیاگ مەوقەی رەدبۊنی لە گەروو هورمز وەرەو دەرچگن، کە زەرەد رەسانە ژوور بزوێنەرەیل و بۊە مدوو زەرەدیگ گیانی لەناو رزەیل تیمەگە.

 دەسە بەریتانییەگە وت کە ئەندامەیل ترەک لە تیمەگە دەسمیەتی لە پاسەوانەیل کەناراو عومانی وەرگرن، و دەسنشان ئەرا ئەوە کرد کە خەوەر نەیەریاس لە هیچ کاریگەرییگ ژینگەیی لە ئەنجام رۊداوەگە، لە وەختیگ دەسەڵاتەیل وەردەوامن لە لێکۆڵینەوە.

 یەیش لە مەوقەیگ تیەێد کە هێمان جۊلەی بارهەڵگری لەڕی گەروو هورمز وە تونی زەرەدمەن بۊە؛ کە هێمان شمارەی کەشتییە رەدبۊەیل لە خانەی تاکەیل وە وەراورد وە زیاتر لە 130 کەشتی کە رووژانە لەڕی گەرووەگە رەد بۊن وەرجە جەنگەگە.

 داتایەیل وەدۊاچگن کەشتییەیل دەرچگ لە کۆمپانیای کپلەر، دۊکە دوشەممە، دەسنشان کردن ئەرا خاوەوبۊنیگ لە جۊلەی دەریاچۊنی لە گەروو هورمز، و دەسنشان کردن ئەرا ئەوەگ پەنج کەشتی بارهەڵگر ئەرا کاڵا بنەڕەتییەیل رووژ شەممە لە گەرووەگە رەد بۊنە، وە بی توومارکردن رەدبۊن هیچ کەشتییگ لە یەکشەممە، وە وەراورد وە 31 کەشتی لە سەرەتای هەفتەی گوزەشتە.

ئی خاوەوبۊنە دۊای ئەو پەلامارەیلە تیەێد کە تانکەرەیل نەفت کردنە ئامانج، هاوەخت وەگەرد پەککەفتن دانوسەنینەیل ناونی ویلایەتە یەکگرتگەیل و ئیران کە ئامانج لەلیان چارەسەرکردن ململانێیەگەس لە خوەرهەڵات ناوەڕاس.