شەفەق نیوز/ ستیڤ ویتکۆف کلکریای تایبەت ئەمەریکا، شەوەکی ئمڕوو شەممە، رەسیە سەڵتەنەتی عومان، دویای سەردانیگ کە لەو ماوە وەگەرد ڤلادیمێر پوتین سەرۆک رووسیا گردەو بوی. 

داتایەیل FlightRadar24 نشان دەن کە فڕۆکەیەی ویتکۆڤ لە سەردانەگەی ئەرا رووسیا لەناوی بویە، جویر ئامادەکارییگ ئەرا دانوسەنین لە عەمان نیشتەو.

لەلاییگ ترەک، دۆناڵد ترەمپ، سەرۆک ئەمریکا، وەرجە دانیشتن رووژ شەممە، لەباوەت بەرنامەی ئەتۆمی ئیران راگەیان کە ئیران "نیەتوەنێد بوودە خاوەن چەک ئەتۆمی". 

دۆناڵد ترەمپ لەناو فڕۆکەی سەرۆکایەتی ئایر فۆرس ون ئەرا رووژنامەنویسەیل وت: خوازم ئیران بوودە وڵاتیگ نایاب و گەورە و بەختەوەر، بەڵام نیەتوەنێد چەک ئەتۆمی بیاشتوود.

ئی قسە چەن ساعەتیگ وەرجە ئەوەگ ستیڤ ویتکۆف نوێنەرەگەی وەرد عەباس عراقچی وەزیر دەیشت ئیران لە عومان گردەو بوود کە مەزەنە کریەێد دانوسەنین سەختیگ وەڕیەو بچوود.

لەلای خوەییش ئیسماعیل بەقائی  قسەکەر وەزارەت دەیشت ئیران راگەیان کە شاند ئیرانی وە سەرۆکایەتی عەباس عراقچی وەرەو شار مەسقەت کەفتیەسە ری و لەورا دانوسەنین ناڕاستەوخۆ وەرد لایەن ئەمریکی ئەنجام دریەێد. 

بەقائی لەبان پلاتفۆرم ئێکس نویسان: "ئیمە وەگەرد بڕیگ لە شارەزاترین کەسەیل وەرەو مەسقەت کەفتیمنە ری و وە ئامادەبوین وەزیر دەیشت ڕێزدار"، وتیش: شاند ئیرانی بڕیارە "گشت توانایەیلی ئەرا مقیەتیکردن سەروەری و بەرژەوەنییە نیشتمانییەیل ئیران کەڵک وەربگرێد".

بڕیارە ئمڕوو شەممە ١٢ی نیسان، دانوسەنین ئاست باڵا لە ناوەین نوێنەرەیل ئیران و ئەمریکا لە عومان وەڕیەو بچوود و لە وەختیگ ناسک کە گرژییەیل لەبان پرس ئەتۆمی ئیران بەرزەو بویە.