شەفەق نیوز/ لە ماوەی ساڵەیل گوزەشتە، باس فرەیگ لە دارایی و سامان ریخریاگ داعش کریا، ک لە دزیکردن و قاچاخکردن ئاسەواری و فرووشتن نەفت لە سوریا و عراق کەفتە دەسی، وەلێ بەش کەمیگ لەو سەروەت و سامانە پەیا کریا.
لە وەشکینیگ وەلایەن هەسدە و هیزەیل ئەمریکا، پەیای بەرمیلەیل تەڵا و پویل لەناو یەکیگ لە باخەیل کربا، وەگورەی قسەی رەوانگەی ماف مرۆڤ سوریا.
بەغدادی لەو شوینە بویە
وتیش: ئەمریکیەیل وەگەرد هەسەدە ئەو پویل و تەڵا لەناو باخیگ لە ناوچەی کەسرەت فرەج لە دەورگرد ریقەی باشوور پەیا کردن، ک وەناو باخ بەغدادی ناسیاگە، چوینکە ئەبو بەکر بەغدادی ریبەر وەرین ریخریاگ داعش مەوقەی داگیرکردن ئەو ناوچە لەناوی داکاسیاگە.
ئەو وەشکینە دویای زانیاری لە حەشارگەیگ ژیروەژیر هات ک سێ ژوور لەناوی پەیا کریا، و چوار بەرمیل پڕ لە تەڵا و نزیکەی یەک مەلیۆن دۆلار پویل لەناوی بوی.
ئەو بەش حەشارگەگە، چەم و پویل ئەرا پەلامارەیل داعش لەناوچەیل هەسەدە لە باکوور سوریا لەناوی بوی.
ئەو پویل و چەکەیلە بریا ئەرا یەکیگ لە ئەمارەیل هاوبەش ناوبەین هەسەدە و هیزەیل ئەمریکا.