شەفەق نيوز– سوەیدا 

کاروانەیل دەسمیەتی مرۆیی، ئمڕوو یەکشەممە، دەسکردنە چگن ئەرا ناو پارێزگای سوەیدا باشوور سوریا، وە سەرپەرشتیاریی مانگ سوور عەرەبی سوری، لەسای رازینەوین شێخ حکمەت هیجری سەرۆک تایفەی دورزی وە چگن شاند حکومەتی یاوەریان ئەرا ناو شارەگە.

 سەرچەوەیلیگ مەیدانی وتن: کاروانەیل ماشینەیل فریاکەفتن و دەسمیەتیەیل خوەراکی و پزشکی لەناویان بوی، و تەنیا ری وە چگن تیم مانگ سوور دریا بچوودە ناو، و شاند حکومەتی ئەرا دیمەشق گلەو خوارد.

 موسعەب ئەلعەلی وەزیر تەندروسی سوریا، دووپات کرد کە شێخ هیجری رازی نەوی شاند حکومەتی بچوودە ناو سوەیدا، و دیاری کرد کە هیجری تەنیا رازی بوی دەسمیەتیەیل مانگ سوور بچنە ناو، و ئەو کاروانەیل وەگەرد شاندەگە ئەرا دیمەشق گلەو خواردن.

هەرلیوا، کەناڵ   "الإخبارية السورية" خەوەردا لە بڵاوبوین هیزەیل ئەمن ناوخوەیی ناوەین پارێزگای درعا و سوەیدا ئەرا مقیەتیکردن رەسین کاروانەیل دەسمیەتی ئەرا خەڵک.

شەوەکی ئمڕوو، وەزارەت تەندروسی سوریا راگەیان کە کاروانیگ لە دەسمیەتی پزشکی ئەرا سوەیدا ئامادە کریاس، ئەوەیش دویای راگەیانن ئاگربەسی، دویای جەنگ سەختیگ ناو ئەنجام پەلاماردان هزوزەیل کووچەریلە باشوور خوەرئاوای پارێزگاگە.