شەفەق نیوز - وەدویاچگن
سوپای ئەمریکی، ئمڕوو دوشەممە، گورز وشانن ئەرا بان بەڵەمیگ کە گومان کریەێد لە قاچاخچیەتی مادەی هووشبەر لە دەریای کارایبی وەکارهاوریاس راگەیان، کە بویە مدوو کوشیان 4 کەس، لە نووترین پەلامار لە چوارچمگ هەڵمەت ئیدارەی سەرۆک دونالد ترەمپ کە ساڵیگە وەردەوامە دژ وە ئەوانەگ وە قاچاخچیەیل مادەی هووشبەر لە ئەمریکای لاتین وەسفیان کەێد.
پەلامار نووەگە شمارەی کوشیاگەیل لە گورزەیل ئەمریکی کە بەلەمەیل کەنە ئامانج بەرزەو کرد ئەرا وەلای کەم 235 کەس، لەماوەی 70 پەلامار لە وەخت دەسوەپیکردن ئیدارەی ترەمپ لە ئامانجکردن ئەوانەگ کە ناویا نەێد "تیرۆریستەیل مادەی هووشبەر" لە ئەیلوول/ سێپتەمبەر 2025ەو.
فەرماندەیی باشوور ئەمریکا وت: پەلامارەگە ئەو کەسەیلە کردیەسە ئامانج کە گومان کریەێد قاچاخچی مادەی هووشبەر بوون، لە ری ریەیل ناسریاگ ئەرا قاچاخچیەتی مادەی هووشبەر، جویر چوین لە فرەیگ بەیاننامەیل سەربازی پەیوەنیدار وە گورزەیلیگ کە هێزەیل ئەمریکی لە خوەرهەڵات زەریای هێمن و دەریای کارایبی جیوەجی کەن.
سوپای ئەمریکا هویچ بەڵگەیگ پێشکەش نەکرد کە بەلەمەگە مادەی هووشبەر هەڵگردوید، لە وەختیگ ڤیدیۆیگ بڵاوکریاگە لەبان پلاتفۆرم "ئێکس" ئەوە نیشان دەێد تەقینەوەگە بویە مدوو ویرانکردن بەلەمیگ جویلیاگ، کە سوپا وە بەلەمیگ تیژڕەو وەسفی کرد.
ئیدارەی ترەمپ تەقەلا دەێد ئەرا بەسانن رێککەفتن وەگەرد وڵاتەیل هاوپەیمان ئەرا فرەوکردن پرۆسەیل زەمینی خوەی لە شمارەیگ لە وڵاتەیل ئەمریکای لاتین، لە چوارچمگ تەقەلایلی ئەرا جەنگکردن دژ وە بازرگانی مادەی هووشبەر.