شەفەق نیوز - ئەڵکەردان تایبەت

ئەدمیراڵ براد کۆپەر فەرماندەی فەرماندەیی ناوەندی ئەمریکی، وت کە گرووپەیل چەکدار لە ناوچەگە، لەناویانیش باڵەیل عراقی، دەس کردنەسە هەواڵەکرن پۊل ئەرا سوپای پاسداران ئیرانی، ئەرا کەمەوکردن ئەو فشارە ئابوورییەیلە کە دۊای 9 مانگ لە جەنگەگە رویوەڕویی بوود.

 کۆپەر، لە پەیامیگ ڤیدیۆیی کە وەخت دیریگ لە شەو جومعە لەبان پلاتفۆرم ئێکس بڵاو کریا، رووشنەو کرد کە گەمارۆ دەریاییەگە زیانەیل مەزەنەکریاگ وە نزیکەی 25 ملیار دۆلار لە داهاتەیل نەفت داگەسە ئیران، وە دەسنشانکردن ئەرا ئەوە کە فەرماندەیی ناوەندی ئەمریکی و وەزارەت گەنجینە لە ماوەی هەفتەیل دۊایین تۊنستنە 350 ملیۆن دۆلار لە سامانیەیل ئیرانی کە وە شیوەی دراوە رەمزدارەیل هەڵگیریاس سڕ بکەن.

وتیش کە گرووپەیل پاڵپشتیکریاگ لەلایەن ئیرانەو، لەناویانیش حزبوڵڵا و حەماس و باڵەیل عراقی، لە ماوەی چەن ساڵیگ پۊل وەرگردنە لە سوپای پاسداران، وەلی ئیسە داواکارن لەییان ئی پۊلەیلە گلەو بیەن.

 کۆپەر باس لەوە کرد، کە فشارە داراییەیل لەبان دامەزراوەی سەربازی ئیرانی رەسیەسە ئاستیگ گەورا، تا رادەیگ کە راپۆرتەیل خەوەر دانە کە باڵەیل لایەنگر تەهران لە سەرانسەر ناوچەگە، مووچەی چەکدارەیلیان بڕینە تا پۊلەگە هەواڵەی سوپای پاسداران بکەن، کە ئەویش وە رۆڵ خوەی رویوەڕوی سەختییەیل بوودەو لە داین مووچەی هیزەیلی.

وتیش کە حکومەت ئیرانی مووچە و خانەنشینی و شایستەیل لە کارمەنەیل کەرت گشتی بڕیە، لەناویانیش ئەندامەیل هیزەیل ئاسایش ناوخۆ و سوپای پاسداران.

 کۆپەر مدوو زیایبۊن دیار لە پەلامارەیل ئیرانی لەبان کەشتییەیل لە تەنگەی هورمز گلەو دا ئەرا ئەو رەوشە کە وەسفی کرد وە رەوش نائومیدی لەناو سوپای پاسداران ئیرانی.