شەفەق نیوز/ سوپای لوبنان، ئمڕوو یەکشەممە، وەڵامدان لەبان ئاگریگ راگەیان کە رەسیە زەویەیل لوبنان لەناو سوریاوە، ئەوەیش دویای دوو رووژ لە راگەیانن هەڵمەتیگ ئەمنی لەلایەن دەسەڵاتەیل لە دیمەشق لە ناوچەیل کەنار سنوور وەبان قاچاخی.

سوپا وت: لەبان فەرمان جۆزێف عۆن سەرۆک کۆمار، سوپا فەرمان دا وە یەکەیلی لەبان سنوور باکوور و خوەرهەڵات وە وەڵامدان سەرچەوەیل ئاگر لە زەویەیل سوریاو وەبان لوبنان.

  لە بەیاننامەیگ وت: ئی یەکەیلە دەسکردنە وەڵامدان وەچەک پووڕیاگ، لە پشت ئەو رویوەڕویبوین دویاییە لە چەن ناوچەیگ لوبنانی کە کەفتنە وەر گورز و گولە.

سوپای لوبنان سەرچەوەیل تەقەکردن وەرەو زەویەیل لوبنان دیاری نەکرد، وەلێ ئاژانس فەرمی وەرجەیە باس کرد کە رووژ شەممە، ناوچەیلیگ لە پارێزگای هرمل سنووری وەرد سوریا کەفتە وەر تەقەکردن لەلایەن سوریا کە بویە هوکار کەفتن 8 زەخمداری، ئەرا خەسەخانە بریان.

رووژ جمعە، سەرۆکایەتی لوبنان راگەیان کە عۆن پەیوەندی وەرد ئەحمەد شەرع کردگە و لەبان هەماهەنگی ئەرا کۆنتڕۆڵکردن رەوش بان سنوور لوبنان و سوریا و نەهیشتن وە ئامانج کردن مەدەنیەیل رێککەفتن.