شەفەق نيوز/ سوپای ئیسرائیل، ئمڕوو یەکشەممە، دووپات کرد کە گورزەیل ئیسرائیل وەبان دامەزراوەیل ئەتۆمی وە هەماهەنگی وەرد تەل ئەبیبەو بوی.

عەمید ئیڤی دیڤرین قسەکەر سوپای ئیسرائیل لە وتار رووژنامەوانی وت: ئی هەماهەنگی قایمە لەی دویاییە وەتایبەت وەرد ئۆپراسیۆنەیل سەربازی ئیسرائیل وەبان ئیران تیەێد.

 وتیش: شەوەکی ئمڕوو ئیران 20 مووشەک وەشان، و فرەیان نواگیری کریان، وتیش: سوپای ئیسرائیل سەکووەیل مووشەکی وەرجە وەشیانیان کردە ئامانج.

عەمید دیڤرین وتیش: ئیمە ئامادەیمن ئەرا سیناریۆەیلیگ جیاجیا لەی رووژەیل بانانە، و ئیمە هایمنە جەنگ وەرانوەر ئیران.

وتیش: ئیمە وەگورەی پلانیگ کار کەیمن کە وەرجەیە دانریانە، و ئامانجەیل خوەمان دیریمن، و ئامادەکاری ئەرا جەنگ کەیمن وەگورەی گەشەیل و وەردەوامی لە کار دیریمن ئەرا وەجیهاوردن ئەو ئامانجەیلە، دووپاتیش کرد کە ئەوەسا پەلامارەیل وەبان مووشەکەیل زەوی زەوی لە ئیران قویلەو کەیمن.