شەفەق نیوز- تاران
لیوا عەلی عەبدوڵڵاهی سەرۆک دەسەی ئەرکان گشتی ئەرا هيزە چەکدارەیل ئیرانی، ئمڕوو دووشەممە، دووپات ئامادەیی وڵاتەطەی کرد ئەرا نواگیریکردن هەر هەڕەشەیگ، وە هوشداریکردن لەوەگ ئەگەر جەنگیگ نوو دژ وە ئیران هەڵسێد، ئەوە ئاگرەگەی دەێدە گشت لایگ.
عەبدوڵڵاهی لە پەیامیگ کە راگەیانن ئیرانی بڵاوی کردگە وت: تەقەلایەیل نوویگ هەن ئەرا جەنگیگ نوو دژ وە ئیران، وەرد ئەو بانگەشە کە ئیران لاوازەو بۊە و تەقەلا دەێد چەکیگ ناوەکی وەدەس باەرێد.
دیاری کرد کە "ئیسرائیل ئەگەر، وە هەر مدوویگ بوود، هەڵەیگ لە هەژمارەیلی بکەێد و جەنگیگ ترەک هەڵسنێد، ئەوە توڕەیی گەل ئیرانی و جەنگاوەرەیل ئیرانی ئومید و ئاواتەیلیان لەناو بەێد".
وتیش کە "ئیران چەوەڕی ئەنجامەیل هەڵوژاردنەیل کۆنگرێس ئەمریکی نەکردگە و نیەکەێد، و چ وەرجە هەڵوژاردنەیل بوود یا دۊای ئەوە، و بی لەوەرگردن ئەنجامەگەی، ئەگەر خوەی یا وە گاڵ لە ئیسرائیلەو هەر گامیگ وەرانوەر کۆمار ئیسلامی ئیرانی بنەێد، ئەوە هیزە چەکدارەیل ئیرانی دەسوەجی و وە تونی و وە شیوەیگ ئازاردەر بەرژەوەنییەیل ئەمریکی وەبی کوت و بەن کەنە ئامانج".
هەمیش وت: بایەسە ئەو دەوڵەتەیلە کە میوانداری هیزەیل ئەمریکی لە ناوچەگە کەن بزانن هەمیش کە هوکار سەرەکی ئەرا ناسەقامگیری لە ناوچەگە و دەرکەفتن کیشە ئابوورییەیل ئامادەبۊن سوپای ئەمریکیە لە ناوچەگە، و تا ئەو وەختە کە ئی ئامادەبۊنە وەردەوام بوود، نەوین ئاسایشیش وەردەوام بوود".