شەفەق نیوز ـ تەهران
قسەکەری سوپای ئیران عەمید محەممەد ئەکرەمینیا، ئمڕوو شەممە دووپات کرد "تەنگەی هۆرمز دویای جەنگ بویە کاریگەرییگ جیۆسیاسییگ چارەنوسساز لە پاڵپشتی ئامانجەیل سیاسەتی دەیشت تەهران".
ئەکرەمینیا لە گفتوگویگ وەگەرد ئاژانس خەوەری ئیرانی «ئیرنا» وت: "ستراتیژ سەربازی ئیران لە ماوەی جەنگ لە وەرگیریەو ئاڵشتکردیە ئەرا پەلامار" روشنیکرد "ئاڵشتکردن ستراتیژی پەلامارداین" مانای ئەنجامدان ئۆپەراسیۆن پێشەنگانە دژ وە دوژمن نییە.
وتیش: "وە هەر کرداریگ پەلاماردەرانە دەسوەجی وە شێوەییگ فراوانتر لە خود کردارە پەلاماردانەگە وەڵام دەینەو"، دیاری کرد "سیستەمە سەربازییەیلەمان کە لە جەنگ زەرەد وەپییان رەسیە دووارە دروسی کردیمن و سیستەم نووتریگ خستینە خزمەت".
دیاریکرد "سوپای ئیران تەقەلا دەێد ئەگەر دوژمن جاریگ تر لە هەشمارکردنەیل خوەی هەڵە بکەێد، بتوانێد لە گوزەشتە گورزیگ قایمتر لەلی بدەێد".
لەباوەت وە دروسبوینی هاوپەیمانییگ لەناو سعودیە، تورکیا و پاکستان، ئەکرەمینیا دیار کرد کە "ئەیە نیشانەی داوەزیان رۆڵ ئەمریکایە لە ناوچەگە".